Në raportin e organizatës UN Women të publikuar sot thuhet se dy nëna vriten në Rripin e Gazës çdo orë që nga fillimi i armiqësive më 7 tetor.
"Që atëherë, ne kemi parë edhe një herë me dëshmi se gratë dhe fëmijët janë viktimat e para të konfliktit dhe se detyra jonë për të kërkuar paqen është një detyrë ndaj tyre", tha drejtoresha ekzekutive e UN Women, Sima Bahous.
Gratë dhe fëmijët përbëjnë afërsisht 70 për qind të personave të vrarë në luftën në Gaza, sipas raportit.
"Këta janë njerëz, jo numra, dhe ne po dështojmë ndaj tyre. Ky dështim dhe trauma e gjeneratave të shkaktuara mbi popullin palestinez gjatë këtyre 100 ditëve e më shumë, do të na ndjekë të gjithëve për brezat që do të vijnë", tha Bahous.
UN Women shprehu gjithashtu shqetësimin për "rrëfimet tronditëse të dhunës seksuale të pandërgjegjshme" dhe bëri thirrje për përgjegjësi, drejtësi dhe mbështetje për të prekurit.
Sipas raportit, të paktën 3 mijë gra mund të jenë bërë të veja dhe kryefamiljare, dhe të paktën 10 mijë fëmijë mund të jenë tani pa baba.
"Ne vazhdojmë të bëjmë thirrje për një armëpushim të menjëhershëm humanitar. Nuk duhet kursyer asnjë përpjekje për të siguruar që gratë dhe vajzat në Gaza të marrin ndihmën humanitare që u nevojitet, duke përfshirë sigurinë dhe mbrojtjen, menjëherë dhe pa pengesa", shtoi ajo.
Izraeli ka nisur sulme të pamëshirshme ajrore dhe tokësore në Rripin e Gazës që nga sulmi ndërkufitar i Hamasit, për të cilin Tel Aviv thotë se u vranë 1.200 njerëz.
Të paktën 24.762 palestinezë janë vrarë që atëherë, kryesisht gra dhe fëmijë, dhe 62.108 janë plagosur, sipas autoriteteve shëndetësore palestineze.
Sipas OKB-së, ofensiva izraelite ka lënë 85 për qind të popullsisë së Gazës të zhvendosur, në mes të mungesës akute të ushqimit, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar./aa
