Presidenti egjiptian, Abdel Fattah el-Sisi, ka përsëritur “refuzimin kategorik” të vendit të tij për zhvendosjen e palestinezëve në Egjipt në çfarëdo mënyre apo forme, një qëndrim që gëzon konsensus të plotë ndërkombëtar.
Kjo erdhi gjatë një telefonate të zhvilluar mes presidentit el-Sisi dhe homologut të tij francez, Emmanuel Macron, në mes të përshkallëzimit të Izraelit në Rafah dhe paralajmërimeve ndërkombëtare kundër shtyrjes së palestinezëve drejt territoreve egjiptiane.
Presidenti egjiptiane tha se el-Sisi mori thirrjen për të diskutuar “përpjekjet e vazhdueshme që synojnë arritjen e një armëpushimi në Rripin e Gazës, shkëmbimin e pengjeve dhe dhënien e ndihmës humanitare”.
Dy presidentët shqyrtuan zhvillimet e fundit dhe theksuan nevojën që palët e interesuara “të bashkëpunojnë për të siguruar përparim që çon në ndalimin e gjakderdhjes dhe zbutjen e vuajtjeve aktuale njerëzore në Rripin e Gazës”.
El-Sisi dhe Macron theksuan “rrezikun e ndonjë përshkallëzimi ushtarak në Rafah për shkak të pasojave të tij katastrofike humanitare mbi pothuajse 1.5 milionë palestinezët që ndodhen në zonë”.
Ata gjithashtu paralajmëruan “rrezikun e zgjerimit të konfliktit në nivel rajonal dhe për këtë arsye theksuan domosdoshmërinë e avancimit të shpejtë të armëpushimit dhe përpjekjeve për qetësi rajonale”./aa
