Punimet për rehabilitimin e aksit Fier-Vlorë, një rrugë me standarde dhe të gjithë parametrat e sigurisë rrugore, janë realizuar në masën 65%.
Zv/kryeministrja, njëherësh ministre e Infrastrukturës dhe Energjisë, Belinda Balluku, ndau sot në rrjetet sociale, pamje nga punimet në këtë aks rrugor, një mundësi më shumë për zonën, qytetarët dhe vizitorët.
Puna për riparimin e plotë të rrugës ekzistuese Fier-Vlorë ka nisur në të dyja anët e trupit të rrugës.
Në zonën e Panajasë do të bëhet devijimi nga rruga e vjetër, duke bërë të mundur ndërtimin e një aksi të ri rrugor që do të bëjë lidhjen me bajpasin e Vlorës.
Po ashtu, do të bëhet rikonstruksioni i urave, tombinove, riparimi dhe ndërtimi i mureve mbajtëse, rregullimi i kthesave duke e rikthyer për përdorim me standardet e një rruge bashkëkohore, plotësuar me sinjalistikë dhe të gjitha parametrat e sigurisë rrugore.
