Presidenti i Republikës së Shqipërisë, Bajram Begaj bëri sot lëvizjen e parë simbolike të shahut në Kampionatin Ndërkombëtar të këtij sporti që mblodhi në Durrës qindra talente nga e gjithë bota, të moshave 8-12 vjeç.
Presidenti Begaj, i pranishëm në ceremoninë hapëse të këtij kampionati, vlerësoi se organizimi i aktiviteteve të tilla është një përpjekje për të sjellë më shumë kulturë dhe më shumë përkushtim ndaj një sporti të veçantë për gjeneratën e re. Ky konkurs, sipas Kreut të Shtetit, është një ngjarje e madhe për Shqipërinë.
“Në këtë mënyrë, – deklaroi Presidenti Begaj, – vendi ynë ka mundësi të tregohet si organizator mbarëkombëtar e si mikëpritës jo vetëm i Samiteve dhe Ministerialeve, por edhe i aktivitete promovuese të talenteve ndërkombëtarë të sporteve.”
“Fëmijët janë e ardhmja dhe është shumë e rëndësishme promovimi dhe vlerësimi i tyre”, theksoi Presidenti, i cili konfirmoi përkushtimin për afrimin e fëmijëve dhe të rinjve me sportin. Një falenderim të veçantë Presidenti Begaj përcolli dhe ndaj presidentit të Federatës Shqiptare të Shahut, Erald Dervishi, Komitetit Olimpik Shqiptar dhe Ministrisë së Arsimit dhe Sportit”, u shpreh Begaj.
“Shqipëria ka shahistët e saj që krenohet ndërkombëtarisht, emra të mëdhenj, si Erald Dervishi që kryeson sot Federatën e Shahut dhe ka arritur të organizojë këtë aktivitet të jashtëzakonshëm, që kanë ngritur lart emrin e Shqipërisë në arenën kombëtare e ndërkombëtare”, u shpreh Presidenti Begaj, i cili uroi që nga ky kampionat të dalin kampionët e ardhshëm të shahut botëror.
Në Kampionatin Ndërkombëtar të Shahut morën pjesë 350 fëmijë nga e gjithë bota, nga të cilët 60 janë nga Shqipëria./ata
