Përfundoi Kampionati Botëror i Shahut për fëmijë që u zhvillua në Durrës prej 3 ditësh, 26, 27, 28 prill. Sonte mbrëmjes u zhvillua ceremonia e dorëzimit të medaljeve fitueseve të tre vendeve të para për vajza dhe djem në disiplinat Rapid dhe Blitz.
Fituese e kampionatit botëror të shahut në grupin e vajzave U12 u shpall Megan Althea Paragua nga USA, ndërkohë medalja për kategorinë U10 shkoi për Indinë, ndërsa fituesja e kategorisë U8 ishte nga Kazakhstani.
“Megan Althea Paragua, 2 herë KAMPIONE në Botërorin e Fëmijëve FIDE 2024, për U12! REZULTAT FANTASTIK! Urime, Megan Althea Urime familjes dhe trajnerëve të saj”, shkruan Federata Shqiptare e Shahut.
Ndërsa medalja për U12 'Open' shkoi për lojtarin rus, U10 'Open' e mori Ukraina, ndërsa në U8 'Open' medalja shkoi sërish për Indinë.
Shahistët e vegjël u përshëndetën nga drejtues të aktivitetit dhe drejtues të sportit shqiptar. Fidel Ylli presidenti i Komitetit Olimpik Shqiptar në fjalën e tij falënderoi pjesëmarrësit në kampionat duke i konsideruar si ambasadorët më të mirë të vendeve të tyre. Në këtë kampionat bënë figurë mjaft të mirë duke arritur rezultate të larta shahistë nga vendet aziatike si Kazakistani, India, Vietnami etj.
Kampionati bëri bashkë më shumë se 380 fëmijë nga 48 vende të botës. Një organizim masiv, duke përfshirë edhe shoqëruesit, e kthyeu Shqipërinë në qendrën e shahut gjatë këtij viti. Të vegjlit garuan mes tyre në disiplinën ‘Rapid and Blitz’./Shqiptarja
