Organizata e OKB-së për Ushqimin dhe Bujqësinë (FAO) njoftoi se mbi një milion njerëz, pothuajse gjysma e popullsisë së Gazës, "pritet të përballen me vdekjen dhe urinë deri në mes të korrikut".
Në një raport lidhur me pikat kritike të urisë, organizata tha se uria po i afrohet Gazës, ndërsa rreziku i urisë vazhdon në Sudan, Haiti, Mali dhe Sudanin e Jugut.
"Konflikti i vazhdueshëm në Palestinë pritet të përkeqësojë më tej nivelet tashmë katastrofike të urisë akute, ku uria dhe vdekja tashmë po ndodhin, krahas numrit të paprecedentë të vdekjeve, shkatërrimit të gjerë dhe zhvendosjes së pothuajse të gjithë popullsisë së Rripit të Gazës", paralajmëron raporti i FAO-s.
"Në mesin e marsit 2024, uria ishte parashikuar të ndodhte deri në fund të majit në dy rajonet veriore të Rripit të Gazës, nëse armiqësitë nuk përfundonin, nuk u jepej qasje e plotë agjencive humanitare dhe nëse nuk rivendoseshin shërbimet thelbësore", thuhet gjithashtu në raport.
Organizata paralajmëroi se "mbi një milion njerëz, gjysma e popullsisë së Gazës, pritet të përballen me vdekjen dhe urinë (IPC Faza 5) deri në mes të korrikut".
Raporti paralajmëron gjithashtu për pasojat më të gjera rajonale të krizës, të cilat mund të përkeqësojnë sfidat ekzistuese të sigurisë ushqimore në Liban dhe Siri.
Izraeli vazhdon ofensivën brutale në Gaza që nga sulmi i Hamasit më 7 tetor, pavarësisht një rezolute të Këshillit të Sigurimit të OKB-së që kërkon armëpushim të menjëhershëm.
Të paktën 36.500 palestinezë janë vrarë që atëherë në Gaza, shumica dërrmuese gra dhe fëmijë, si dhe rreth 83 mijë të tjerë janë plagosur.
Gati tetë muaj pas luftës izraelite, zona të gjera të Gazës janë kthyer në gërmadha mes një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë (GJND), e cila në vendimin e saj të fundit ka urdhëruar Tel Avivin të ndalojë menjëherë operacionin në qytetin jugor Rafah, ku mbi 1 milion palestinezë kanë kërkuar strehim nga lufta përpara se të pushtohej më 6 maj./aa
