Kryeministri britanik kërkoi falje për anashkalimin e ceremonisë ndërkombëtare të "Ditës D" në Francë dhe udhëtimin për në Britani për një intervistë televizive.
"Gjëja e fundit që dua është që përkujtimet të hijëzohen nga politika", shkroi Rishi Sunak në X, duke iu referuar largimit të tij të hershëm nga ceremonia e 80-vjetorit të zbarkimit të Normandisë në Francë.
Sunak ngjalli reagime pasi anashkaloi ceremoninë e madhe ndërkombëtare për një intervistë në ITV për zgjedhjet e përgjithshme të ardhshme më 4 korrik.
Kryeministri britanik tha se ai kujdeset "thellësisht" për veteranët dhe është i nderuar që përfaqësoi Mbretërinë e Bashkuar në një numër ngjarjesh në Portsmouth dhe Francë gjatë dy ditëve të fundit dhe që takoi ata që luftuan me guxim.
"Pas përfundimit të ngjarjes britanike në Normandi, u ktheva në Mbretërinë e Bashkuar. Me reflektim, ishte gabim të mos qëndroja më gjatë në Francë dhe kërkoj falje", tha Sunak.
Një sërë ngjarjesh u zhvilluan të mërkurën në Britani dhe Francë për të shënuar 80-vjetorin e zbarkimit në Normandi gjatë Luftës së Dytë Botërore./aa
