Tashmë qytetarët shqiptarë do të kenë mundësi që të fluturojnë direkt drejt Zagrebit. Pak ditë më parë aeroporti Ndërkombëtar i Tiranës (TIA) ka zgjeruar listën e destinacioneve duke shtuar edhe fluturimin më të ri drejt Zagrebit, Kroaci.
Croatia Airlines ka kryer më datën 14 qershor fluturimet direkte Zagreb-Tiranë-Zagreb. Në aeroportin “Nënë Tereza” u mbajt një ceremoni festive e përurimit të fluturimit të parë të kësaj linje. Në këtë ceremoni krahas Ambasadorit Riza Poda, morën pjesë përfaqësues të Ambasadës së Kroacisë në Tiranë, drejtues të kompanisë Croatia Airlines, CEO i Aeroportit “Nënë Tereza”, pasagjerët e parë të kësaj linje si dhe media të ndryshme.
Në përshëndetjen e tij me këtë rast, Ambasadori Poda falënderoi kompaninë Croatia Airlines dhe Kastrati Group për këtë bashkëpunim, si dhe vlerësoi vendosjen e linjës direkte ajrore mes dy kryeqyteteve, si një projekt shumë të rëndësishëm. Ai gjithashtu nënvizoi impaktin që ky shërbim do të ketë në intensifikimin e mëtejshëm të bashkëpunimit ekonomik, investimet, turizmin si dhe rritjen e shkëmbimeve tregtare dypalëshe.
“Kam bindjen se fillimi i këtyre fluturimeve direkte, do të intensifikojë bashkëpunimin e investimeve të ndërsjella, turizmin dhe shkëmbimet tregtare”, -tha ambasadori shqiptar në Kroaci.
Ceremonia përuruese kaloi në një atmosferë të ngrohtë e miqësore./BalkanWeb
