Sot është Dita Botërore e Rinisë, dedikuar mbi një miliard vajzave e djemve që përbëjnë rreth 16 për qind të popullsisë së globit.
Kryetarja e Kuvendit, Elisa Spiropali duke përkujtuar këtë ditë u shpreh se, prej 25 vjetësh, 12 gushti ka hyrë në kalendarin botëror si një ditë reflektimesh, angazhimesh e mundësish për të rritur kujdesin, zgjeruar aksesin dhe nxitur pjesëmarrjen e brezit të ri në zhvillim e mirëqenie.
“Tema e kësaj Dite për vitin 2024 “Shtigjet digjitale drejt një të ardhmeje të qëndrueshme”, përkon edhe me politikat tona për rininë dhe ambicjet e guximshme të vajzave e djemve të Shqipërisë drejt sfidave të teknologjisë e informacionit”, theksoi Spiropali në një postim në rrjetet sociale.
Spiropali u shpreh se, sot është dita të mendojmë, punojmë e investojmë më shumë për mbështetjen ligjore, institucionale e financiare të talenteve, nismave e sipërmarrjeve rinore në ekonominë, shërbimet dhe botën digjitale, ku ka hyrë vitet e fundit Shqipëria.
Spiropali ka edhe një mesazh për median në këtë ditë.
“Në vend të modeleve të jetës boshe, zvetënimit e falsitetit, jepini vend e pasqyroni modelet e të rinjve të ditur, punëtorë, protagonistë, qytetarë të denjë, njerëz të vërtetë, që me talent ndërtojnë jetën e tyre dhe kontribuojnë për Shqipërinë”, nënvizoi kryeparlamentarja
“Talentet e start-up-eve, ekselentët që kthehen nga universitetet e huaja për t’i shërbyer Shqipërisë, nxënësit e studentët e apasionuar pas dijeve, por edhe vajzat e djemtë që bëjnë me dinjitet punët e thjeshta që u ofron tregu janë modelet që duhet të ndiqen”, theksoi Spiropali./ata
