Numri i të vdekurve nga trazirat e vazhdueshme në territorin tejoqeanik të Francës Kaledonia e Re raportohet se është rritur në 11 që nga fillimi i ngjarjeve në maj pas një projektligji të propozuar për ndryshimin e rregullave zgjedhore.
Një burrë është vrarë gjatë përleshjeve me oficerët e zbatimit të ligjit në qytetin Thio, në bregun lindor të ishullit, tha transmetuesi "NC la 1ere".
Njësitë e rendit kanë ndërhyrë për të zhbllokuar rrugët që ishin bllokuar nga një grup prej rreth 20 personash. Fillimisht, oficerët kanë përdorur gaz lotsjellës për të shpërndarë grupin, por situata është përshkallëzuar, duke i bërë ata të përdorin armët e zjarrit për shkak të rezistencës intensive.
Një nga rebelët është qëlluar për vdekje në kokë gjatë përplasjes.
Arkipelagu i Paqësorit është përfshirë në trazira që nga 13 maji, të shkaktuara nga një projektligj i propozuar për rishikimin e rregullave zgjedhore. Ndryshimet do të kishin lejuar shtetasit francezë që kanë jetuar në ishull për të paktën dhjetë vjet të votojnë në zgjedhjet lokale.
Megjithatë, banorët vendas, veçanërisht popullsia indigjene Kanak, kishin frikë se ndryshimet do të pakësonin fuqinë e tyre të votimit.
Në përgjigje të dhunës në rritje, Franca shpalli gjendjen e jashtëzakonshme dhe vendosi forca shtesë për të ndihmuar autoritetet lokale në rivendosjen e rendit.
Më 12 qershor, Macron pezulloi planin e diskutueshëm të reformës zgjedhore në Kaledoninë e Re./aa
