Zjarrfikësit në rrethin Karşıyaka të Izmirit kanë rifilluar ndërhyrjet ajrore pasi erërat e forta kanë përkeqësuar zjarrin pyjor që ka çuar në evakuime dhe shkatërrime të përhapura në Türkiyen perëndimore gjatë dy ditëve të fundit.
Zjarri, i cili filloi në zonën Yamanlar Karatepe në rrethin Karşıyaka, është intensifikuar, duke detyruar evakuimin e tri lagjeve dhe duke kërcënuar si zonat e banuara, ashtu edhe ato industriale.
Me shfaqjen e dritës së mëngjesit, përpjekjet për shuarjen e zjarrit nga ajri u rifilluan, me ekipet në terren që vazhduan të luftojnë flakët pavarësisht kushteve sfiduese.
Zjarri ka shkatërruar tashmë 16 banesa dhe ka detyruar evakuimin e 87 shtëpive dhe 45 bizneseve. Një strehimore e kafshëve u evakuua gjithashtu ndërsa zjarri u përhap dhe tymi nga pyjet e djegura ka prekur shumë pjesë të qytetit, duke përfshirë rrethet Bayraklı dhe Çiğli.
Reaguesit e urgjencës, duke përfshirë ekipet e pyjeve, bashkitë lokale, policinë, Autoritetin e Menaxhimit të Fatkeqësive dhe Emergjencave (AFAD) dhe personelin e xhandarmërisë, po punojnë së bashku me makineri të rënda dhe pajisje të specializuara për ta vënën nën kontroll zjarrin.
Ndërkohë, një zjarr pyjor po vazhdon në rrethin Bozdoğan të provincës Aydın. Zjarri në lagjen Alhisar është shuar gjatë gjithë natës me ndërhyrje ajrore dhe tokësore.
Sot në mëngjes, numri i mjeteve ajrore të përfshira në operacion është rritur në tetë helikopterë dhe shtatë avionë.
Mbi 300 pjesëtarë ekipesh janë përfshirë në mënyrë aktive në përpjekjet e shuarjes së zjarrit Bozdoğan, duke përdorur 32 kamionë zjarrfikës, 11 cisterna uji dhe pesë buldozerë.
Pavarësisht terrenit të vështirë dhe erërave të forta, ekipet mbeten të vendosura për të vënë nën kontroll zjarrin.
Gjithashtu, përpjekjet për shuarjen e zjarrit në provincën veriperëndimore Bolu kanë vazhduar për 45 orë.
Zjarri filloi në një zonë fshati në rrethin Göynük dhe po luftohet me 11 helikopterë, 356 automjete dhe makineri dhe 1.213 pjesëtarë ekipesh nga Bolu dhe provincat përreth.
Ekipet ajrore dhe tokësore qëndrojnë në vendngjarje, duke punuar për ta vënë nën kontroll zjarrin./aa
