Kreu i PD-Demokratët Euroatlantikë, Lulzim Basha, shprehet se, korrupsioni është gangrenë më e madhe e shoqërisë dhe zhvillimit ekonomik në vend.
Ai thekson se, Shqipëria ka humbur miliarda euro për shkak të korrupsionit masiv.
Basha publikoi në rrjetet sociale disa nga pikat e programit për ndërhyrje të shpejt në luftën ndaj korrupsionit.
Disa prej tyre janë mbështetja e SPAK dhe GJKKO, themelimi i Njësisë të Zbulimit dhe Rikuperimit të Pasurive të Vjedhura, verifikimi i kontratave koncesionare dhe PPP, forcimi i KLSH dhe kthimi në një Gjykatë të Kontrollit të Shtetit me fuqi ekzekutive.
“Korrupsioni mbetet gangrena më e madhe për shoqërinë dhe zhvillimin ekonomik të vendit. Shqiptarët kanë humbur mbi 10 miliardë euro për shkak të korrupsionit masiv, të shpërndarë në çdo hallkë të qeverisjes”, u shpreh Basha.
“Në programin tonë ne parashikojmë ndërhyrje të shpejta dhe konkrete për të luftuar korrupsionin. Ne do të themelojmë, sipas praktikave më të mira, Njësinë e Zbulimit dhe Rikuperimit të Pasurive të Vjedhura, për të gjurmuar kudo pasuritë e vjedhura të shqiptarëve dhe për t’ia kthyer ato arkës publike; Mbështetje e plotë dhe e gjithanshme si dhe bashkëpunim me SPAK dhe GJKKO; Ndryshime ligjore në Ligjin “Anti-Mafia”për të luftuar korrupsionin dhe abuzimet e zyrtarëve të lartë; Verifikimi i kontratave koncesionare, PPP-ve, Prokurimeve Publike dhe anullimi i çdo kontratë korruptive; Konfiskimi i pasurive të zyrtarëve publik të përfshirë në këto akte dhe PPP abuzive”, nënvizoi Basha.
Gjithashtu, ai theksoi se, Kontrolli i Lartë i Shtetit do të shndërrohet në një Gjykatë të Kontrollit të Shtetit, me fuqi ekzekutive.
“Do ta shndërrojmë Kontrollin e Lartë të Shtetit, që sot ka fuqi rekomanduese, në një Gjykatë të Kontrollit të Shtetit, me fuqi ekzekutive, vendimet e të cilit do të zbatohen menjëherë dhe pa asnjë pikëpyetje nga qeveria e ardhshme dhe nga çdo instancë e shtetit shqiptar”, u shpreh Basha.
Ai gjithashtu shtoi se, do të bëhet, rishikimi i kuadrit ligjor për pjesëmarrjen e operatorëve off-shore në tendera dhe koncesione.
“Çdo kontratë abuzive do të jetë subjekt i ligjit antimafia. “Të gjithë të barabartë para ligjit” do të jetë fakt dhe jo slogan në qeverisjen tonë. Me parimin “Ndiq paranë” dhe me vetting-un e politikanëve ne do të spastrojmë Parlamentin, qeverisjen qendrore dhe lokale nga politikanët e korruptuar, të pasuruar në kurriz të shqiptarëve – Shqiptarët duhet të dinë kush janë politikanët e korruptuar dhe kush jo”, theksoi Basha.
Ai gjithashtu premtoi heqje të imunitetit të deputetëve duke i hapur rrugë hetimit të plotë nga ana e SPAK të çdo zyrtari të dyshuar për korrupsion.
“Rishikim i Kodit Penal për ashpërsim të masave për të gjitha veprat e korrupsionit aktiv dhe pasiv”, tha Basha.
“Duke luftuar korrupsionin ne mundësojmë më shume investime, më shumë punësim, më shumë shërbime cilësore për qytetarët tanë. Sepse Shqipëria dhe shqiptarët meritojnë më shumë”, theksoi ai./ata
