Një delfin i vetmuar dhe potencialisht i frustruar seksualisht është fajësuar për një rritje të sulmeve ndaj notarëve në një qytet bregdetar japonez. Delfini besohet të jetë pas 18 sulmeve pranë qytetit Mihama deri më tani, me gishtin e një fëmije i cili pati nevojë për të paktën 20 qepje.
Të paktën gjashtë persona u plagosën në sulme vitin e kaluar, duke lënë një notar me brinjë të thyera. Kjo ka bërë që zyrtarët të paralajmërojnë se jo vetëm që gjitarët mund t'ju "kafshojnë me dhëmbët e tyre të mprehtë dhe t'ju shkaktojnë gjakderdhje", por gjithashtu mund t'ju "zvarritin në det, gjë që mund të jetë kërcënuese për jetën".
Pavarësisht reputacionit të tyre si kafshë miqësore, sulmet e delfinëve mund të jenë fatale. Në vitin 1994, një delfin në Brazil sulmoi dy notarë meshkuj që u përpoqën ta hipnin në të, duke vrarë njërin dhe duke plagosur tjetrin. Delfini, me nofkën Tião, besohet të ketë plagosur të paktën 22 persona më parë.
Profesor Morisaka tha se delfinët meshkuj komunikojnë duke luajtur dhe kafshuar njëri-tjetrin.
“Ata nuk po përpiqen të lëndojnë njerëz, por po përdorin mënyrën e komunikimit të delfinëve me njerëzit”, tha ai.
Të tjerë kanë sugjeruar teori të ndryshme se pse e njëjta krijesë mund të jetë pas këtyre sulmeve – duke përfshirë dëshirën për tu shumuar.
“Delfinët janë kafshë shumë sociale dhe kjo shoqëri mund të shprehet në mënyra shumë fizike”, tha Dr Simon Allen, një biolog.
"Ashtu si te njerëzit dhe kafshët e tjera shoqërore, luhatjet hormonale, zhgënjimi seksual ose dëshira për të dominuar mund ta shtyjnë delfinin të dëmtojë njerëzit me të cilët ndërvepron. Duke qenë se ata janë kafshë kaq të fuqishme, kjo mund të çojë në lëndime serioze te njerëzit."
Dr Allen shtoi se delfini mund të jetë i përjashtuar nga komuniteti i tij dhe po kërkon shoqëri alternative./OraNews
