Të paktën shtatë palestinezë u vranë sot dhe disa të tjerë u plagosën në një sulm ajror izraelit ndaj një ndërtese kolegji që strehon persona të zhvendosur në Qytetin e Gazës, tha një burim mjekësor.
Sulmi kishte në shënjestër ndërtesën e Kolegjit Namaa në veriperëndim të Qytetit të Gazës, ku qindra palestinezë të zhvendosur janë strehuar, shtoi burimi.
“Ekziston kërcënim nga ushtria izraelite për të goditur përsëri kolegjin”, paralajmëroi Agjencia Palestineze e Mbrojtjes Civile në një deklaratë.
Sipas dëshmitarëve, një nga ndërtesat e kolegjit u shkatërrua në sulmin izraelit.
“Zona e synuar ishte e mbushur me banorë dhe njerëz të zhvendosur”, tha një dëshmitar okular për Anadolu.
Izraeli ka shënjestruar sistematikisht objektet civile, duke përfshirë shkollat, spitalet dhe vendet e adhurimit në mes të ofensivës së tij brutale në Rripin e Gazës, pavarësisht një rezolute të Këshillit të Sigurimit të OKB-së që kërkon armëpushim të menjëhershëm.
Sipas rregullave të luftës, shënjestrimi i objekteve të tilla civile mund të përbëjë krim lufte.
Sulmi izraelit në Gaza ka rezultuar në më shumë se 40.800 palestinezë të vrarë, kryesisht gra dhe fëmijë, dhe rreth 94.300 të plagosur, sipas autoriteteve lokale shëndetësore.
Bllokada e vazhdueshme e Gazës ka çuar në mungesa të mëdha të ushqimit, ujit të pastër dhe ilaçeve, ndërsa sulmet izraelite kanë lënë pjesën më të madhe të rajonit në gërmadha.
Izraeli përballet me akuza për gjenocid në Gjykatën Ndërkombëtare të Drejtësisë, e cila ka urdhëruar ndalimin e operacioneve ushtarake në qytetin jugor Rafah, ku mbi një milion palestinezë kishin kërkuar strehim përpara se zona të pushtohej më 6 maj./aa
