Ministri i Ekonomisë, Kulturës dhe Inovacionit, Blendi Gonxhja deklaroi sot se “shkolla e Mesme Profesionale për TIK “Hermann Gmeiner”, në Sauk të Tiranës, mirëpret 300 nxënës me çeljen e sezonit shkollor 2024-2025, pas ndërhyrjes rehabilituese”.
Gonxhja ndau në rrjete sociale pamje nga ambientet e shkollës teksa infomoi se, “programet e shkollës bazohen tek modeli dhe profili i shkollës austriake”.
Sipa tij, profili i shkollimit është nga më të kërkuarit, duke regjistruar nxënësit që kanë përfunduar me rezultate të mira dhe shumë të mira shkollat 9-vjeçare.
Për të garantuar cilësi, u kushtohet rëndësi njohurive të larta në matematikë si dhe përvetësimit të njohurive të gjuhëve të huaja anglisht dhe gjermanisht. Për zhvillimin e gjuhës angleze dhe asaj gjermane (si gjuhë e dytë) përdoren kurrikulat e gjimnazit, tashmë të konsoliduara dhe të mirëvlerësuara.
Gonxhja vuri në dukje se shkolla TIK “Hermann Gmeiner”, ndodhet në një zonë të qetë dhe të gjelbëruar duke ofruar gjithashtu mjedise shumë të mira dhe të përshtatshme për zhvillimin cilësor të procesit mësimor dhe edukativ.
Orët e praktikave teorike dhe të laboratorëve, zhvillohen në mjedise të kompletuara ku çdo post pune ështe i pajisur me mjete të reja.
Nxënësve, përveç orëve të shumta në laborator, u mundësohet edhe praktika në biznese e kompani.
Ministri Gonxhja theksoi se, kualifikimet sikurse kompetencat profesionale dhe pedagogjike të mësuesve jane vendimtare për cilësinë e shërbimit të arsimit profesional të shkollës.
“Stafi i shkollës është i përzgjedhur më kujdes, ai i nënshtrohet trajnimeve fillestare por edhe të vazhdueshme për t’u përditësuar me të rejat më të fundit në fushën e TIK. Ne mënyrë të vazhdueshme zhvillohen orë të hapura mësimore duke konkluduar me analiza te mësimdhënies si dhe sygjerime për përmirësime të mëtejshme”, u shpreh Gonxhaj.
Ministri nënvizoi se, MEKI po punon për një investim të ri për “Hermann Gmeiner 2” së shpejti./ata
