Gazetari i Vizion Plus Bepin Kolvata ka mësuar detaje të reja rreth ngjarjes që u shënua mëngjesin e kësaj të diele në Malësinë e Madhe.
Dy të plagosurit janë Besmir Çofi dhe Avenir Hasanaj, të cilët ndodhen në spital për ndihmë mjekësore. Autor i kësaj ngjarje është Lul Rakaj.
Policia ka mbërritur në vendin e ngjarjes dhe po punon për zbardhjen e rrethanave.
Deri më tani nuk janë bërë ende të ditura rrethanat e kësaj ngjarje.
“Rreth orës 09:45, në fshatin Vrakë, në hyrje të një lokali, dyshohet se shtetasi L. R., ka plagosur me armë zjarri shtetasit B. Ç dhe A. H, të cilët janë transportuar në spitalin rajonal të Shkodrës për ndihmë mjekësore.
Shërbimet e Policisë kanë shkuar menjëherë në vendngjarje bashkë me grupin hetimor dhe drejtues të Drejtorisë Vendore të Policisë Shkodër.
Në ndihmë të Policisë Vendore për kapjen e autorit kanë shkuar dhe grupe të Forcës Kombëtare të Sigurisë, Njësia Shkodër dhe vijojnë kontrollin e zonës dhe në ambjente të ndryshme ku dyshohet se mund të jetë fshehur autori i dyshuar”, njofton policia.
Grupi hetimor në drejtimin e Prokurorisë po punon për zbardhjen e rrethanave dhe dokumentimin ligjor të rastit./vizionplus.tv
