Fuqizimi i sistemit dual, që është ndarja e kohës mes bankave të shkollës dhe praktikës në biznese është fokusi i qeverisë shqiptare.

Kryeministri Edi Rama gjatë podkastit të tij “Flasim”, ku kishte të ftuar për të folur mbi arsimin profesional Drejtoreshën e Shkollës Teknike Ekonomike, Tiranë, Anila Nanaj, dhe nxënësen e shkollës profesionale teknike “Gjergji Canco”, Anja Bregu theksoi se jemi larg krijimit të një sistemi dual që mundëson ndarjen e drejtë të kohës në auditorë dhe qëndrimit në punë në një ndërmarrje.

“Ne po punojmë edhe fatmirësisht kemi një skuadër të mirë në këtë pjesën e koordinimit dhe eksperiencave. Kemi një grup ekspertësh që janë të mbështetur nga qeveria gjermane, austriake e zvicerane dhe duam të sistemojmë vërtet si duhet pjesën e vajtjes në punë, që të jetë vajtje në punë, në një sipërmarrje që është pjesë e marrëveshjes së përgjithshme me Ministrinë e Arsimit, pjesë e sistemit të integruar të arsimit profesional”, u shpreh Rama.

Lajmi pozitiv që kemi marrë këtë vit nga sipërmarrja, theksoi Rama, ka qenë rritja e jashtëzakonshme e interesimit të sipërmarrjes për t’ju afruar arsimit profesional. Sepse, theksoi ai, tanimë e shikojnë që ka kaq nevojë për krah të kualifikuar pune.

“Dhe ndërkohë që ekonomia rritet, bëhet gjithnjë e më madhe nevoja për punonjës të kualifikuar, për të qëndruar me ritmin e rritjes së ekonomisë dhe për të mos mbetur prapa. Marrim turizmin që është në një garë të fortë me fqinjët, që janë shumë përpara nesh në shumë aspekte dhe kjo është shumë shpresëdhënëse që të sistemojmë me pagesë për nxënësit me një pagesë të dedikuar ata dhe me garancitë për prindërit që nxënësit bëjnë shkollën përmes praktikës dhe nuk janë punonjës që sipërmarrja ti trajtojë për shërbim”, deklaroi Rama.

Kjo, sipas tij, do të thotë të hapësh kapitull të ri në arsimin profesional. Rama tha se do po investohet edhe në konvikte, për të ofruar kushte dinjitoze. “Sepse është thelbësore që për ata nxënës që vijnë nga zonat rurale të mos u ofrohen më konvikte që nuk janë me kushte dinjitoze për fëmijët që duke ardhur në zona rurale vijnë nga familje me të ardhura më të ulëta dhe nuk mund ti lëmë të ndjehen si fëmijë të kategorisë së dytë“, u shpreh kryeministri./ata