Kryeministri i Kosovës, Albin Kurti, është pritur në New York nga Princi i Kuvajtit, Sabah Khaled Al-Hamad Al Sabah, në kuadër të Javës së Nivelit të Lartë të Asamblesë së Përgjithshme të Kombeve të Bashkuara (AP-OKB).
Siç njofton Zyra e Kryeministrit, në këtë takim, Kurti shoqërohej nga zëvendëskryeministrja dhe njëherësh ministre e Punëve të Jashtme dhe Diasporës, Donika Gërvalla-Schwarz, zëvendësministrja e Punëve të Jashtme dhe Diasporës, Liza Gashi, si dhe Konsulli i Përgjithshëm i Kosovës në New York, Blerim Reka.
Kryeministri Kurti dhe Princi i Kuvajtit Sabah Khaled Al-Hamad Al Sabah, biseduan rreth fuqizimit të mëtejmë të marrëdhënieve bilaterale, mundësitë e zgjerimit të bashkëpunimit dhe rritjes së investimeve.
Fillimisht, në emër të shtetit, kryeministri e falënderoi Kuvajtin për mbështetjen e vazhdueshme ndaj Kosovës.
Në vijim, teksa u trajtua progresi që ka njohur Kosova në vitet e fundit, Kurti përmendi indikatorët kryesorë të cilët pasqyrojnë zhvillimin ekonomik, si mesatarja prej 6.2 për qind e rritjes ekonomike, e cila u përshëndet edhe nga Princi i Kuvajtit, duke e uruar Kosovën për hapat zhvillimorë drejt avancimit ekonomik të vendit.
Palët biseduan edhe mbi potencialin investues në Kosovë dhe mundësinë e zgjerimit të investimeve të kompanive nga Kuvajti në Kosovë në fusha si energjia e ripërtëritshme, agrikultura e infrastruktura.
Kryeministri Kurti i ftoi kompanitë kuvajtiane që të vijnë të investojnë e zgjerojnë fushëveprimtarinë e tyre edhe në Kosovë duke operuar në një ambient të sigurt të të bërit biznes si dhe shtoi mundësinë e mbajtjes së një forumi investitorësh për bizneset në Kosovë./aa
