Mediat siriane raportuan se Izraeli ka kryer sulme ajrore në kryeqytetin Damask gjatë natës.
Në lajmin e agjencisë së lajmeve të regjimit, SANA thuhet se, "Sistemet tona të mbrojtjes ajrore sulmuan objektivat e armikut për të tretën herë sonte".
Në një lajm tjetër të SANA-s, bazuar në një burim ushtarak, pretendohet se Izraeli i kreu sulmet në kryeqytet me avionë luftarakë dhe dronë.
Thuhet se sistemet siriane të mbrojtjes ajrore i rezistuan raketave dhe dronëve dhe rrëzuan shumicën e tyre.
Nga ana tjetër, mediat e regjimit njoftuan se Safa Ahmed, një prezantuese që punonte për Televizionin Shtetëror Sirian, vdiq në sulm.
Në lajmin e "Damascus FM" thuhet se si pasojë e sulmit në rajonin Al-Mazzeh ka rënë zjarr.
Asnjë deklaratë nuk është bërë nga Izraeli në lidhje me sulmin.
Ambasada e Iranit në Damask ndodhet në rajonin Al-Mazzeh, i cili thuhet se është në shënjestër të Izraelit. Izraeli kreu një sulm ajror në ndërtesën e konsullatës së Iranit në Damask më 1 prill. Gjithsej 7 zyrtarë iranianë nga Korpusi i Gardës Revolucionare iraniane, 2 prej të cilëve gjeneralë, vdiqën në këtë sulm.
Llogaritë e mediave sociale të njohura si afër regjimit pretenduan se avionët izraelitë shënjestruan disa pika ushtarake në fshatin Asad, periferinë Qudsayya dhe lagjen Al-Dimas në jug të Damaskut dje.
Dihet se në Damask dhe zonat rurale ka elementë të Hezbollahut libanez, si dhe të ushtrisë siriane dhe grupeve terroriste të mbështetura nga Irani.
Izraeli ka kryer sulme të herëpashershme ndaj grupeve të mbështetura nga Irani dhe pikave ushtarake që i përkasin ushtrisë siriane në Siri që nga fillimi i luftës civile në 2011./aa
