Ushtria izraelite konfirmoi sot se Irani në sulmin e fundit raketor shënjestroi dy nga bazat e tij ajrore, Nevatim dhe Tel Nof, raporton Radioja e Ushtrisë Izraelite.
Pavarësisht sulmeve, ushtria ka deklaruar se të dyja bazat ajrore mbeten plotësisht funksionale.
"Bazat funksionojnë me kapacitet të plotë dhe vetëm dje dhe një ditë më parë, nga këto baza u nisën sulme ajrore që shënjestruan Bejrutin", vuri në dukje ushtria, duke iu referuar sulmeve të saj në Liban.
Baza ajrore Nevatim, e vendosur pranë Beershebas në jug të Izraelit dhe baza ajrore Tel Nof, e vendosur në Rehovot në rajonin qendror të vendit, janë objektet kryesore për operacionet e Forcave Ajrore të Izraelit.
Irani gjuajti më shumë se 180 raketa balistike drejt Izraelit të martën në shenjë hakmarrjeje për vrasjen e liderit politik të Hamasit, Ismail Haniyeh, dhe liderit të Hezbollahut, Hassan Nasrallah.
Teherani paralajmëroi se nëse Izraeli i përgjigjet sulmit, do të përballet me më shumë "sulme dërrmuese".
Izraeli kishte shënjestruar Nasrallahun dhe komandantët e tjerë të Hezbollahut në një sulm ajror në periferitë jugore të Bejrutit më 27 shtator.
Ndërkaq, Haniyeh u vra në një sulm në një rezidencë shtetërore gjatë një vizite në Teheran në fund të korrikut./aa
