ëllimi i tregtisë globale të mallrave pritet të rritet me 2.7 për qind në vitin 2024, tha Organizata Botërore e Tregtisë (OBT) në një përditësim të Perspektivës dhe Statistikave të Tregtisë Globale. Ky parashikim është pak më i lartë se parashikimi i mëparshëm i OBT-së prej 2.6 për qind i bërë në prill.
Sipas raportit, tregtia globale e mallrave përjetoi një prirje rritëse në gjysmën e parë të 2024, duke shfaqur një rritje nga viti në vit prej 2.3 për qind. Kjo rritje pritet të pasohet nga një zgjerim i mëtejshëm i moderuar gjatë pjesës së mbetur të vitit dhe në vitin 2025.
Rritja reale globale e Produktit të Brendshëm Bruto me kurset e këmbimit të tregut parashikohet të mbetet e qëndrueshme në 2.7 për qind si në vitin 2024 ashtu edhe në vitin 2025, thuhet në raport.
OBT vuri në dukje se nga mesi i vitit 2024, inflacioni ishte ulur mjaftueshëm për të mundësuar bankat qendrore që të reduktonin normat e interesit. Kjo rënie e inflacionit pritet të rrisë të ardhurat reale të familjeve dhe të stimulojë shpenzimet konsumatore, ndërkohë që normat e ulëta të interesit duhet të inkurajojnë firmat të rrisin shpenzimet e tyre për investime.
Drejtoresha e Përgjithshme e OBT-së, Ngozi Okonjo-Iweala deklaroi se pritet një rimëkëmbje graduale e tregtisë globale për vitin 2024, ndërkohë që mbetet vigjilent ndaj pengesave të mundshme, veçanërisht përshkallëzimit të mundshëm të konflikteve rajonale si ato në Lindjen e Mesme.
Impakti mund të jetë më i rëndë për vendet e prekura drejtpërdrejt, por mund të ndikojë gjithashtu në mënyrë indirekte kostot globale të energjisë dhe rrugët e transportit. Është e domosdoshme të punohet kolektivisht për të siguruar stabilitet ekonomik global dhe rritje të qëndrueshme, pasi këto janë thelbësore për rritjen e mirëqenies së njerëzve në mbarë botën, theksoi ajo.
Raporti parashikon një rënie të eksporteve në Evropë me 1.4 për qind dhe një rënie të importeve me 2.3 për qind në vitin 2024. Eksportet evropiane janë ndikuar negativisht nga sektorët e automobilave dhe kimikateve të rajonit. Ndërkohë, eksportet në Azi për këtë vit pritet të rriten me 7.4 për qind, duke tejkaluar rajonet e tjera./Scan
