Indonezia ka nisur procesin për t’u bërë anëtare e bllokut BRICS, tha ministri i Jashtëm i sapoemëruar Sugiono.
Hapi erdhi pasi qyteti rus i Kazanit priti samitin e 16-të të krerëve të vendeve anëtare të BRICS-it, si dhe një format të zgjeruar së bashku me liderët dhe përfaqësuesit e atyre kombeve që kërkojnë t'i bashkohen grupit ekonomik në zhvillim.
“Vendimi i Indonezisë për të aplikuar për t’u bashkuar me BRICS-in është një manifestim i politikës sonë të jashtme të lirë dhe aktive”, tha Sugiono, i cili u betua si kryediplomat në fillim të kësaj jave.
Sugiono, ish-ushtar, ka qenë prej kohësh ndihmës i presidentit Prabowo Subianto, i cili mori presidencën të dielën e kaluar, pasi fitoi zgjedhjet në fillim të këtij viti.
Ministri i Jashtëm tregoi gjithashtu opsionet e politikës së jashtme të administratës Prabowo.
“Kjo nuk do të thotë që ne jemi të lidhur me ndonjë bllok specifik, por përkundrazi, që marrim pjesë aktive në të gjitha forumet”, tha Sugiono.
“Ne gjithashtu mendojmë se prioritetet e BRICS-it janë në përputhje me programin e administratës së re të Indonezisë, duke përfshirë sigurinë e ushqimit dhe energjisë, çrrënjosjen e varfërisë dhe zhvillimin e burimeve njerëzore”, shtoi ai.
Duke iu bashkuar BRICS-it, tha Sugiono, “Indonezia kërkon të lartësojë interesat e përbashkëta të vendeve në zhvillim ose të Jugut Global”.
“Ne e shohim BRICS-in si platformën e duhur për të diskutuar dhe çuar përpara interesat e përbashkëta të Jugut Global… Megjithatë, ne do të ruajmë gjithashtu angazhimin tonë me forume të tjera dhe do të vazhdojmë diskutimet me vendet e zhvilluara”, tha Sugiono.
Në samitin e BRICS-it morën pjesë anëtarët e vjetër Brazilin, Rusinë, Indinë, Kinën dhe Afrikën e Jugut – burimi i emrit të grupit – së bashku me anëtarët e fundit Egjipti, Etiopia, Irani dhe Emiratet e Bashkuara Arabe. Presidenti turk Recep Tayyip Erdoğan mori pjesë në samit si i ftuar.
Komiteti organizativ i BRICS-it tha se 36 vende morën pjesë në takim, 22 prej të cilave u përfaqësuan nga krerët e shteteve, duke përfshirë presidentin turk Recep Tayyip Erdoğan.
Në samit morën pjesë liderë nga Azia, Afrika, Lindja e Mesme dhe Amerika Latine, si dhe përfaqësues të disa organizatave ndërkombëtare./aa
