Prokuroria e Tiranës ka dyshime të mjaftueshme se dosja për mashtrimin me mikrokreditë, e cila ka shkaktuar dëme të mëdha financiare te mijëra shtetas shqiptarë, mund të jetë e kryer nga një grup i strukturuar kriminal. Ndaj, ajo mundet t’i kalojë Prokurorisë së Posaçme SPAK.
Nga sa kuptohet, ka dyshime se subjektet financiare dhe përmbaruesit e tyre kanë vepruar pikërisht në kuadër të një grupi të strukturuar kriminal, në kohë dhe me role të ndara. Por, ende po vlerësohen kompetencat për kalimin e gjithë dosjes pranë Prokurorisë së Posaçme.
Më 21 tetor, Policia e Shtetit ka bërë me dije se është arrestuar përmbaruesi gjyqësor, Alban Kote, i përmendur në dosjen e mikrokredive, duke e bërë kështu arrestimin më të fundit në këtë dosje voluminoze.
Specialistët e Sektorit për Hetimin e Krimit Ekonomik dhe Financiar ekzekutuan vendimin penal për 43-vjeçarin, banues në Tiranë.
Kjo pasi Gjykata e Shkallës së Parë e Juridiksionit të Përgjithshëm Tiranë i ka vendosur masën e sigurimit personal “Arrest në burg” për veprën penale “Shpërdorimi i detyrës”.
Mikrokreditë
Sipas Prokurorisë shoqëritë ‘Micro Credit Albania’ dhe ‘Final’ kanë ngritur skemë mashtrimi për të zhvatur qytetarët. Prokuroria thotë se MCA, Final dhe ADCA kanë përndjekur e u kanë ushtruar presion kredimarrësve.
Nga hetimet, rezultoi se shoqëritë tregtare MCA dhe Final, në bashkëpunim me Shoqërinë ADCA dhe me disa shoqëri të tjera përmbarimore, por edhe me ndihmën e një eksperte vlerësuese, duke pasur që në fillim të ushtrimit të aktivitetet të tyre (aktivitetit të blerjes dhe mbledhjes së kredive të këqija) mendimin unik kriminal, kanë krijuar së bashku një skemë mashtruese me qëllim vjedhjen dhe zhvatjen e qytetarëve që aktualisht përllogaritet në miliona Euro.
Si rrjedhojë shoqëritë MCA dhe Final kanë përfituar të ardhura dhe pasuri të paligjshme, të cilat ua kanë vjedhur dhe zhvatur qytetarëve, që përllogariten në 10-tra milion Euro sipas mënyrës së sipërcituar, para dhe prona të cilat i kanë investuar apo përdorur në aktivitete të tjera./Dita
