Në një kundërpërgjigje, Koreja e Jugut gjuajti gjithashtu një raketë balistike, tha ushtria e vendit sot, dy ditë pasi Koreja e Veriut lëshoi disa raketa balistike me rreze të shkurtër veprimi.
Zyra e Shefave të Përbashkët të Shtabit të Koresë së Jugut (JCS) tha se dje ushtria gjuajti një raketë balistike tokë-tokë “Hyunmoo-II” në Detin e Verdhë.
Sipas JCS-së, raketa u lëshua në qarkun bregdetar perëndimor Taean, 108 kilometra në jugperëndim të kryeqytetit Seul.
Koreja e Veriut kishte lëshuar të paktën shtatë raketa balistike me rreze të shkurtër veprimi të martën në Detin Lindor.
“Përmes kësaj stërvitjeje me zjarr të drejtpërdrejtë, ushtria jonë tregoi vendosmërinë e saj të fortë për t’iu përgjigjur çdo provokimi të Koresë së Veriut, si dhe aftësitë dhe qëndrimin për goditje precize kundër origjinës së provokimit të armikut”, tha JCS-ja në një deklaratë për Yonhap me bazë në Seul.
Të enjten e javës së kaluar të enjten, Koreja e Veriut testoi raketën e re balistike ndërkontinentale “Hwasong-19” në atë që Pheniani e përshkroi si versionin “përfundimtar” të raketave të saj me rreze të gjatë veprimi.
Ushtria e Koresë së Jugut mbajti gjithashtu stërvitje kundër dronëve në Seul të enjten. Kjo erdhi pasi Koreja e Veriut akuzoi ushtrinë e Koresë së Jugut për inkursion me dron mbi kryeqytetin Phenian muajin e kaluar.
Lansimet e raketave në Gadishullin Korean erdhën në mes të tensioneve të rritura pasi Seuli ka pretenduar se Pheniani ka vendosur mijëra trupa në Rusi, e cila është në luftë me Ukrainën.
Si përgjigje, Seuli mund të rishikojë ndalimin e furnizimeve me armë për Kievin, paralajmëroi presidenti i Koresë së Jugut, Yoon Suk Yeol, popullariteti i të cilit ka rënë në 17 për qind, që është më i ulëti që kur ai mori detyrën në maj 2022./aa
