Kanë nisur punimet për ndërtimin e urës së Viroit në Gjirokastër me fondet e Bankës Botërore. 1.6 milionë euro do të shërbejnë për këtë projekt dhe për kalimin nga një rrugë e kategorisë C në C2 me gjerësi të korsive 2x 3.5 metra.
Ky objekti i ri, do të garantojë siguri që të mos ketë përmbytje nga vërshimet e ujërave në ditë me intensitet të lartë reshjesh.
Ura ekzistuese që lidh Tepelenën me Gjirokastrën dhe Kakavijen, jo pak herë është bllokuar si pasojë e daljes nga shtrati të liqenit Virua dhe lumit Drino.
Zëvendëskryeministrja, njëherësh Ministre e Infrastrukturës dhe Energjisë, Belinda Balluku në Komisionin për Ekonominë dhe Financat ka thënë se janë adresuar urat që kishin kushtet më të vështira.
Projekti i zbatimit, bën që e gjithë gjurma të kalojë paralel me rrugën ekzistuese, në anë lindore të saj (nga ana e lumit Drino), duke lenë në funksionim urën ekzistuese si shëtitore panoramike përreth liqenit.
Kjo urë, do të ketë ndikim dhe në turizëm, pasi vizitorët do të kenë mundësi të shikojnë më lehtë Parkun e Viroit, që është një nga më të veçantët në jug të vendit.
Për rrjetin rrugor kombëtar, pritet që rreth 80 ura me përparësi me fluks trafiku prej 100 deri në 2500 mjete në ditë dhe kanale nën rrugë, të kërkojnë ndërhyrje./Scan
