Të paktën 26 persona janë vrarë dhe shumë të tjerë janë plagosur në një shpërthim me bombë në stacionin hekurudhor të qytetit Quetta në Pakistanin jugperëndimor sot herët, tha policia.
Deri më tani 26 persona janë vrarë dhe 46 të tjerë janë plagosur, tha për Anadolu Muhammad Akram, zyrtar i policisë lokale.
Më herët, një zyrtar i lartë i policisë lokale, Muhammad Baloch, tha se incidenti duket të jetë një sulm vetëvrasës.
Ai shtoi se shpërthimi goditi një sportel biletash në stacionin në kryeqytetin e provincës Balochistan, Quetta.
Raportet fillestare tregojnë se shpërthimi ka ndodhur kur treni ishte gati të largohej nga stacioni për në Peshawar në provincën Khyber Pakhtunkhwa.
Duke pasur parasysh trafikun e zakonshëm të lartë në stacion, autoritetet kanë frikë se numri i viktimave mund të rritet.
Policia dhe ekipet e shpëtimit mbërritën shpejt në vendngjarje, ndërsa masat urgjente u zbatuan në Spitalin Civil të Quettas, me mjekë shtesë dhe staf mbështetës për të ndihmuar viktimat.
Pakistani ka pësuar 785 sulme terroriste gjatë dhjetë muajve të parë të vitit 2024, duke rezultuar në 951 të vdekur dhe 966 të plagosur, duke reflektuar një nivel vazhdimisht të lartë të dhunës në gjithë vendin, sipas një raporti nga Instituti i Pakistanit për Studimet e Konflikteve dhe Sigurisë, një qendër mendimi me bazë në Islamabad.
Megjithëse sulmet terroriste dhe bombat kanë rënë në numër në Pakistan, tetori u shfaq si muaji i dytë më vdekjeprurës i vitit, pasi numri i viktimave u rrit në 198.
Në mesin e të vdekurve gjendeshin 98 terroristë, 62 personel sigurie dhe 38 civilë./aa
