Ambasadori i Bashkimit Evropian në Tiranë, Silvio Gonzato vizitoi të mërkurën qytetin e Kavajës.
Gonzato pati një takim me kryebashkiakun Fisnik Qosja për të diskutuar planet e qytetit në fuqizimin e turizmit, trashëgimisë dhe bujqësisë.
“Gëzohem që dëgjova nga Kryetari i Bashkisë se këta sektorë të rëndësishëm po trajtohen si shtysa të zhvillimit ekonomik”, theksoi Gonzato në një reagim në rrjetet sociale.
“Ramë dakord që e ardhmja e Shqipërisë si një destinacion turistik duhet të ndërtohet mbi vlerësimin e trashëgimisë lokale, respektimin e mjedisit dhe ruajtjen e burimeve të shumëllojshme natyrore të Shqipërisë”, theksoi Gonzato.
“Teksa anëtarësimi i Shqipërisë në Bashkimin Evropian po bëhet realitet me negociatat në zhvillim e sipër, gjeta rastin ta falënderoj kryebashkiakun edhe për rolin e tij në bashkimin e shoqatave të qeverisjes vendore në Shqipëri në funksion të bashkëpunimit të tyre me kryetarët e bashkive në BE”, nënvizoi ambasadori i BE-së, Silvio Gonzato./ata
