Deputetja e Partisë Demokratike, Jorida Tabaku ka reaguar sot në lidhje me ndërtimet në Tiranë dhe sistemin bankar.
Në një postim në rrjetet sociale, Tabaku vë theksi te ndërtimet në kryeqytet, që sipas saj i kanë zënë frymën Tiranës dhe po shkaktojnë një rritje fiktive të çmimeve.
“Ndërtimi, sektori bankar dhe e ardhmja!Për vite me radhë kam denoncuar degradimin e ndërtimit në Tiranë si dhe lidhjen me pastrimin e parave të pista në sektorin e ndërtimit. Pak vite më parë në një komunikim zyrtar me bankën e Shqipërisë për të konfirmuar nëse volumi i kredive të sektorit bankar justifikonte volumin e ndërtimit përgjigja zyrtare ishte se sektori i ndërtimit financohej nga “burime alternative”.Sot, kur më Tiranë po ndërtohet 1.8 mln m2 ndërtim dhe qyteti po shpërfytyrohet duke mbuluar e zhdukur çdo simbol të qytetit, ndërtimi po kthehet në një rrezik dhe për sektorin bankar. Risku i kredive që sektori bankar është i ekspozuar është më i larti në rajon! 37 përqind e kredive të sektorit bankar janë për ndërtimin, pa përfshirë këtu burimet alternative, paratë që nuk vijnë nga sektori bankar, duke e bërë ndërtimin jo vetëm një sistem piramidal por duke e bërë atë riskun real të këtij sektori! Sot i është zënë fryma gjithë Tiranës me ndërtesa cip më cip, të cilat përveçse nuk kanë as bukuri estetike po shkaktojnë një rritje fiktive te çmimeve dhe po bëhen pengesa kryesore pse shtresa e mesme nuk blen dot një shtëpi.”, shkruan Tabaku
Në vijim Tabaku vë theksin te pamundësia e të rinjve për të patur një streh, ku sipas saj i një çifti normal i duhen 99 vite për të blerë një apartament në Tiranë.
“ Një çifti normal i duhen 99 vite për të blerë një apartament në Tiranë. Rritja e vit pas viti e çmimeve, rritja e stokut të banesave dhe ndërtimet pa fre nuk kanë asnjë logjikë jo vetëm ekonomike po dhe as sociale e të planifikimit.Nuk ka kumbull të kuqe që mund ti bëjë hije ndërtimeve në qendrën e Tiranës e për sa kohë askush nuk flet për rreziqet e kësaj që ndodh në Tiranë, lukunia e ndërtimeve do vazhdojë duke gllabëruar dhe ato pak hapësira e objekte identitare që kanë ngelur!Ekonomia shqiptare nuk mund dhe nuk duhet të varet nga ndërtimet të cilët përveçse nuk janë model afatgjatë rritjeje, thjesht tregojnë dhe theksojmë pabarazinë që po ndodh në çdo sektor”, shkruan Tabaku.
