Deputetja e Partisë Demokratike Jorida Tabaku reagoi sot për humbjen e opozitës dhe Partisë Demokratike në zgjedhjet vendore të 14 majit. Në një postim në rrjetet sociale, Tabaku bën përgjegjës drejtuesit politikë të opozitës, të cilët nuk u dhanë një alternativë demokratëve. Ajo e konsideron bashkimin e demokratëve dhe ringritjen e PD-së si një domosdoshmëri. “Sot, jam me kokën ulur para demokratëve, votuesve të djathtë e kujtdo. Nuk arritëm dot të japim një alternativë përbashkuese për PD, që pavarësisht kësaj sherrnajës që kush bën çfarë, i morëm për të mirëqenë se njerëzit do votojnë logon apo mitin me sy mbyllur. Nuk mund të jetë zgjidhje dhe as alternativë mllefi! Nuk mund të jetë zgjidhje dhe alternativë përleshja e pakuptimtë që ka ndarë demokratët. Nuk mund të jetë zgjidhje apo alternativë izolimi i vazhdueshëm dhe fshehja pas alibive që nuk na bëjnë fitues, por na zvogëlojnë përditë. Në çdo kuti votimi nga Vermoshi në Konispol, mesazhi i shqiptarëve dhe demokratëve është i qartë”, tha ajo. Po ashtu, Tabaku shton se “ne duhet të pranojmë gabimet tona duke e përdorur krenarinë tonë për të ndërtuar një PD ndryshe dhe jo për të mohuar faktet”. “Askush nuk mund të mohojë problemet me zgjedhjet si krimi, korruptimi, blerja e votës, presionet. Por ndryshe nga çdo herë tjetër duhet të bëjmë së pari një vështrim nga vetja! Koha dhe humbjet e njëpasnjëshme kanë treguar që denoncimet pa reflektim janë kthyer në bumerang elektoral. Prandaj A-ja është bashkimi me një analizë se përse mbjellja e urrejtjes mes demokratëve nuk mbjell dot shpresën tek shqiptarët po dëshpërimin! PD duhet të ringrihet nga hiri dhe duhet të jetë alternativë për shqiptarët. Nuk mund të jemi bojkoti i shqiptarëve kur mund të jemi lehtësisht alternativa e një shumice”, shkruan ajo.