Ushtria izraelite ka përfunduar pushtimin e "lagjes së liderëve" të Hamasit në qytetin qendror të Gazës. Kjo u raportua nga zëdhënësi i Forcave të Mbrojtjes së Izraelit, Daniel Hagari, duke specifikuar se zona përfshin një rrjet tunelesh të ndërlikuar që lidhin apartamente, zyra dhe strehë të përdorura nga eksponentë të rëndësishëm ushtarakë dhe politikë të Lëvizjes Islamike, duke përfshirë Ismail Haniyeh, Yahya Sinëar dhe Mohammed Deif.
"Kështu, ne kemi përfunduar demaskimin e qytetit terrorist nëntokësor të Hamasit në veri: ne do ta çmontojmë atë dhe do të synojmë infrastrukturat e tyre strategjike". I njëjti fat do të godasë gjithashtu "strehimet nëntokësore të udhëheqësve të Hamasit në Khan Yunis", siguroi Hagari.
Ndërsa më herët kryeministri izraelit, Benjamin Netanyahu mohoi mundësinë e një armëpushimi dhe tha se lufta do të vazhdojë deri në shkatërrimin e plotë të Hamasit.
Ushtria izraelite tha mbrëmë se kishte zbuluar një qendër kryesore komanduese të Hamasit në zemër të qytetit të Gazës, duke i dhënë atë që ajo e përshkroi si një goditje të madhe për grupin militant islamik. Zëdhënësi i Forcave të Mbrojtjes të Izraelit (IDF), kundëradmirali Daniel Hagari, shpjegoi se ushtria ka identifikuar thelbin e një rrjeti të gjerë nëntokësor të përdorur nga Hamasi për të lëvizur armë, militantë dhe furnizime në të gjithë Rripin e Gazës.
Izraeli është gati për një armëpushim dyjavor për të lejuar lirimin e pengjeve ende në enklavën palestineze. Këtë e ka raportuar kanali izraelit në gjuhën arabe Makan-33, duke specifikuar megjithatë se palët janë ende larg një marrëveshjeje. Hamasi, në fakt, e refuzon këtë lloj marrëveshjeje dhe bën thirrje për t'i dhënë fund luftës.
