Për shkak të Kemal Ataturkut është anuluar finalja e Superkupës së Turqisë, e cila ishte planifikuar të zhvillohej të premten në Riad.
Galatasaray dhe Fenerbahce, ndërsa udhëtonin drejt tokës saudite për të luajtur për titullin, iu bë me dije nga autoritetet vendase se simbolet kombëtare turke nuk do të lejoheshin në fushë.
Të dy grupet donin të festonin 100-vjetorin e themelimit të shtetit të Turqisë dhe kishin përgatitur… një festë me protagonist Kemal Ataturk.
Ata donin të ngrinin një flamur me Kemalin, një pankartë me sloganin “Paqe në atdhe, paqe në botë” dhe gjithashtu të shfaqeshin futbollistët e tyre me bluza me foton e “babait të turqve”.
Ata donin gjithashtu që të luhej Himni Kombëtar i Turqisë. Por e gjithë kjo u ndalua nga sauditët dhe pavarësisht negociatave dy skuadrat vendosën të mos luanin dhe ndeshja u anulua.
Sauditët vendosën policinë në dhomat e zhveshjes për të parandaluar lojtarët nga të dyja skuadrat të mbanin bluzat e Kemal Atatürk nëse shkonin në fushë, ndërsa turqit pretenduan se tifozët e tyre ishin larguar me forcë nga tribuna.
Lidhur me këtë, Federata Turke e Futbollit lëshoi një deklaratë të përbashkët së bashku me dy skuadrat:
“Për të festuar 100-vjetorin e demokracisë turke, federata e futbollit dhe klubet tona organizuan një festë jashtë vendit në mënyrë të tillë që të kontribuonte në imazhin dhe vlerat e futbollit turk dhe klubeve tona.
Super Kupa e planifikuar të zhvillohej të premten më 29 dhjetor 2023 në orën 20:45 është shtyrë për një datë të mëvonshme si rezultat i një vendimi të përbashkët që kemi marrë me klubet për shkak të disa problemeve në këtë ngjarje.
Dëshirojmë të falënderojmë federatën e futbollit dhe organet dhe organizatorët përkatës të vendit pritës për përpjekjet e bëra për ndeshjen”. /tesheshi.com/
