Ministri izraelit i Trashëgimisë nga radhët e ekstremit të djathtë, Amihai Eliyahu, ka përsëritur thirrjen e tij për të "hedhur bombë bërthamore" në Rripin e Gazës së bllokuar.
Sipas lajmit të gazetës izraelite 'Haaretz', Eliyahu vizitoi qytetin Khalil në jug të Bregut Perëndimor të pushtuar.
Në deklaratën e tij atje, Eliyahu përsëriti "thirrjen për hedhjen e bombës bërthamore në Gaza" dhe theksoi se ai e dinte gjithashtu qëndrimin e Gjykatës Ndërkombëtare të Drejtësisë (GJND), e cila po trajton çështjen e "gjenocidit" kundër Izraelit.
Më 29 dhjetor, Republika e Afrikës së Jugut ngriti një padi në GJND duke arsyetuar se sulmet e Izraelit në Gaza shkelnin Konventën e Gjenocidit dhe kërkoi një urdhër të përkohshëm kundër Izraelit.
Në peticionin e saj drejtuar GJND-së, Afrika e Jugut shtoi deklaratën e ministrit të Trashëgimisë, Eliyahu, në lidhje me hedhjen e armëve bërthamore në Gaza si synim i Izraelit për të kryer gjenocid në Gaza.
Deklarata e ministrit izraelit për "mundësinë e hedhjes së një bombe bërthamore në Gaza"
Në një program radioje që mori pjesë më 5 nëntor, Eliyahu tha se përdorimi i një bombe bërthamore ishte një nga mundësitë në luftën në Gaza.
Pas kësaj deklarate, kryeministri Benjamin Netanyahu pezulloi ministrin Eliyahu nga mbledhjet e kabinetit për një kohë të pacaktuar.
Ish-kryeministri, Yair Lapid, i bëri thirrje kryeministrit izraelit të shkarkojë ministrin Eliyahu.
Pas reagimeve ndaj deklaratave të tij skandaloze për Rripin e Gazës, Eliyahu bëri një hap prapa dhe argumentoi se deklarata e tij për bombën bërthamore ishte "metaforike"./aa
