Sipas rezultateve paraprake të regjistrimit të popullsisë, amvisërive dhe banesave në vitin 2023, Mali i Zi ka 633.158 banorë, njoftoi Drejtoria për Statistikat (MONSTAT).
Regjistrimi mblodhi të dhëna për 217.441 amvisëri dhe 396.873 apartamente, ndërsa gjithsej 673.203 persona u regjistruan gjatë fazës së mbledhjes së të dhënave.
Njoftimi paraqet rezultatet paraprake të regjistrimit të popullsisë, amvisërive dhe banesave, i cili është zbatuar në periudhën 3-30 dhjetor 2023, në përputhje me rekomandimet ndërkombëtare të UNECE dhe udhëzimet e rregullores së aplikuar 763/2008 të Parlamenti Evropian dhe Këshillit të Bashkimit Evropian.
Numri i banorëve u rrit me rreth dy për qind krahasuar me regjistrimin e vitit 2011, kur në shtet kishte 620.029 banorë.
Numri më i madh i banorëve është regjistruar në Podgoricë, Nikshiq, Tivar dhe Bijelo Polje, ndërsa më i vogli në Shavnik, Pluzhine dhe Zhabljak.
Rezultatet paraprake të regjistrimit përmbajnë të dhëna bazë për numrin e përgjithshëm të personave të regjistruar, numrin e banorëve, familjeve dhe banesave të nxjerra në bazë të rezultateve për rrethet e regjistrimit në terren.
Pas futjes së të dhënave të mbledhura nga regjistrimi, kryerjes së kontrolleve statistikore dhe përpunimit statistikor të tyre në përputhje me metodologjinë e përcaktuar, rezultatet përfundimtare të regjistrimit do të sigurohen dhe do të publikohen në gjysmën e dytë të vitit 2024./aa
