Familjet e pengjeve izraelite të mbajtura nga Hamasi kanë akuzuar kryeministrin Benjamin Netanyahu për zbulimin e një kasete në të cilën ai kritikonte rolin e Katarit në negociatat e shkëmbimit të të burgosurve me grupin palestinez.

Haim Rubinstein, një zëdhënës i familjeve të pengjeve, në një deklaratë me shkrim tha se “të gjitha bisedat që zhvillohen në takimet me kryeministrin regjistrohen nga zyra e tij dhe bashkëpunëtorët e tij të pranishëm në takim”.

“Familjeve pjesëmarrëse në takim u morën telefonat në hyrje”, tha ai.

Rubinstein e quajti rrjedhjen e komenteve të kryeministrit izraelit si një “çështje të rëndë që tregon një humbje të kontrollit”.

Komentet e rrjedhura nga takimi i Netanyahu-t me të afërmit e pengjeve treguan se kryeministri kritikoi rolin e Dohas në bisedimet për shkëmbimin e të burgosurve me Hamasin.

“Katari, nga këndvështrimi im, nuk është i ndryshëm në thelb nga OKB-ja dhe Kryqi i Kuq (i Katarit) është edhe më problematik. Nuk kam asnjë iluzion për ta. Ata kanë ndikim (mbi Hamasin), sepse (Katari) i financon ata”, tha Netanyahu në një regjistrim të transmetuar nga transmetuesi izraelit Channel 12.

Komentet e zbuluara tërhoqën zemërim nga Katari, i cili akuzoi Netanyahu-n për sabotim të bisedimeve për lirimin e pengjeve me Hamasin për interesa politike.

Grupi i rezistencës palestineze kërkon dhënien fund të ofensivës vdekjeprurëse të Izraelit në Rripin e Gazës për çfarëdo marrëveshje për shkëmbimin e të burgosurve me Izraelin.

Qeveria izraelite ka refuzuar thirrjet për ndalimin e luftës në Gaza deri në shkatërrimin e Hamasit dhe lirimin e pengjeve.

Izraeli ka nisur një ofensivë vdekjeprurëse në Rripin e Gazës që nga sulmi ndërkufitar nga grupi i rezistencës palestineze Hamas më 7 tetor, që sipas autoriteteve izraelite besohet se vrau 1.200 persona.

Që atëherë, sipas autoriteteve palestineze në Gaza, të paktën 25.700 palestinezë janë vrarë, kryesisht gra dhe fëmijë, si dhe 63.740 të tjerë janë plagosur.

Sipas Kombeve të Bashkuara (OKB), lufta izraelite ka shkaktuar zhvendosjen e brendshme të 85 për qind të popullsisë së Gazës mes mungesës akute të ushqimit, ujit të pastër dhe ilaçeve, ndërkohë më shumë se gjysma e infrastrukturës së enklavës është dëmtuar ose shkatërruar./aa