Transformimi urban i shtrirë në çdo qytet të vendit, jo vetëm që shkurton distancat dhe lehtëson arritjen e destinacioneve, por po çliron edhe potencialet turistike, në zonat ku kohët e fundit po marrin zhvillim turizmi i bujtinave dhe sporteve në natyrë.
E tillë është rruga Peshkopi-Maqellarë, që e lidh gjurmën e Rrugës së Arbrit me qendrën e qarkut Dibër, në kantierin e së cilës po punohet me intensitet të lartë për të përmbyllur brenda afateve këtë investim të rëndësishëm, që do të shkurtojë ndjeshëm distancën me kryeqytetin, duke e bërë të përshkueshme në harkun e thuajse 1 ore, si dhe do të nxisë fluksin e qarkullimit të vizitorëve dhe turistëve në këtë zone.
Kryeministri Edi Rama ndau sot në rrjetet sociale pamje nga kantieri i këtij aksi rrugor, ku po vijon puna me ritme të larta.
“Në kantierin e rrugës Maqellarë-Peshkopi vijojnë punimet, ku ka përfunduar nënkalimi i rrugës së fshatit Dovolan dhe sistemimi i përroit të fshatit Herebel, bashkë dhe me ndërtimin e dy urave në këto fshatra. Ky segment rrugor, pjesë e rrugës së Arbrit do të shkurtojë distancën duke bërë që rruga nga dalja e Tiranës deri në Peshkopi të përshkohet për 1 orë“, tha Rama./ata
