Izraeli ka akuzuar Afrikën e Jugut për shpërdorim të juridiksionit të Gjykatës Ndërkombëtare të Drejtësisë (GJND) duke kërkuar masa të reja për shkak të planeve të ushtrisë izraelite për të zgjeruar sulmin e saj tokësor në qytetin Rafah në jug të Rripit të Gazës, ku janë strehuar rreth 1,4 milion palestinezë.

Izraeli ka thënë se kërkesa e Afrikës së Jugut është “e veçantë” dhe “e papërshtatshme” në vend që të trajtojë çështjen e sulmit të planifikuar.

Tel Avivi ka deklaruar se çështja e ngritur kundër tij nga Afrika e Jugut për shkeljen e Konventës së Gjenocidit është “krejtësisht e pabazuar në fakt dhe ligj”, “moralisht e neveritshme” dhe përfaqëson “një abuzim si me Konventën e Gjenocidit, ashtu edhe me vetë Gjykatën”.

Në deklaratat e tij, Izraeli, duke pretenduar se i përmbahet ligjit ndërkombëtar në sulmet e tij në Gaza, ka thënë se gjykata kishte vendosur tashmë për masa të caktuara kohët e fundit dhe se nuk kishte ndryshime të rëndësishme në Gaza që do të bënin të nevojshme masa të reja.

Izraeli akuzoi Afrikën e Jugut për mosinformimin e duhur të gjykatës për veprimet e grupit palestinez Hamas dhe për përdorimin e mekanizmit të masës paraprake jo si një “mburojë” mbrojtëse, por si një “shpatë” kundër Izraelit.

Izraeli ka thënë se gjykatës i mungon juridiksioni për të menaxhuar konfliktet e vogla të armatosura në Gaza dhe akuzoi Afrikën e Jugut për përpjekje për të minuar të drejtën e Izraelit për vetëmbrojtje dhe manipulimin e gjykatës, duke përmendur aleancën e saj të gjatë me Hamasin.

Izraeli gjithashtu ka kërkuar që gjykata të refuzojë kërkesën e Afrikës së Jugut për masa shtesë.

Afrika e Jugut të hënën i kërkoi GJND-së që urgjentisht të vlerësojë synimet e Izraelit për të zgjeruar praninë e tij ushtarake në Rafah, qyteti më jugor i Gazës, duke i kërkuar gjykatës të shqyrtojë nëse duhet të përdorë fuqinë e saj për të parandaluar shkeljet e mëtejshme të të drejtave të palestinezëve.

Izraeli nisi një ofensivë vdekjeprurëse në Gaza më 7 tetor, duke vrarë më shumë se 28.600 palestinezë dhe duke plagosur 67.147 të tjerë, sipas autoriteteve lokale shëndetësore.

Rreth 1.200 izraelitë besohet se janë vrarë në sulmin e Hamasit.

Ofensiva izraelite ka zhvendosur brenda territorit 85 për qind të popullsisë së Gazës, e cila po përballet me mungesë akute të ushqimit, ujit të pastër dhe ilaçeve, ndërsa 70 për qind e infrastrukturës së enklavës është dëmtuar ose shkatërruar, sipas OKB-së.

Izraeli është akuzuar për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Avivin të ndalonte aktet gjenocidale dhe të merrte masa për të garantuar ofrimin e ndihmës humanitare për civilët në Gaza./aa