Kryeministri Edi Rama ndau sot pamje nga laguna e Kunes, Vain në Lezhë.
Laguna e Kunes, në Vain të Lezhës, përveç se një nga asetet turistike të veriperëndimit të vendit, është një atraksion i përhershëm dhe lehtësisht i arritshëm falë ndërtimit të infrastrukturës. Laguna, e shpallur e para zonë e mbrojtur në vend, rreth 80 vjet më parë, gjendet 8 km larg Lezhës. Ajo cilësohet si një nga më interesantet dhe gjithnjë e më shumë po tërheq vizitorë të huaj dhe vendas.
Laguna ka një panoramë të mrekullueshme, ka infrastrukturë të ngritur në ndihmë të vizitorëve, vlera arkeologjike dhe kulinari interesante.
Sot, kjo Zonë e Mbrojtur shfrytëzohet edhe për turizëm të vëzhgimit të shpendëve të shumtë ujorë që shumohen në këtë kënetë. Në përbërje të lagunës hyjnë mjedise detare, lagunore, ligatinore, pyje, shkurre dhe livadhe, që ndërthuren hijshëm midis tyre.
Ajo dallohet për larmi të madhe të botës së gjallë me rreth 227 specie bimësh, 17 lloje molusqesh, 10 lloje amfibësh, 24 lloje zvarranikësh, disa lloje peshqish, si qefulli, levreku, koca, ngjala. Veçanërisht e pasur është bota e shpendëve (196 lloje migratore dhe të përhershëm), e cilësuar si “ornitologjia e Mesdheut”, 23 specie gjitarësh: lepuri, dhelpra, ujku, derri i egër, etj./ata
