Të paktën 86 palestinezë të tjerë janë vrarë brenda 24 orëve të fundit, ndërsa Izraeli vazhdon sulmet e tij në Rripin e Gazës së rrethuar.
“Gjatë 24 orëve të fundit, pushtimi izraelit ka kryer shtatë masakra kundër familjeve në Rripin e Gazës, duke lënë 86 martirë dhe 131 të plagosur”, tha Ministria e Shëndetësisë me bazë në Gaza.
Ministria palestineze theksoi se shumë njerëz mbeten të bllokuar nën rrënoja dhe në rrugë pasi ekipet e shpëtimit nuk janë në gjendje t’i arrijnë ato.
Duke shpërfillur vendimin e përkohshëm të Gjykatës Ndërkombëtare të Drejtësisë, Izraeli vazhdon sulmet në Rripin e Gazës, ku që nga 7 tetori të paktën 29.692 palestinezë janë vrarë, kryesisht gra dhe fëmijë, si dhe 69.879 janë plagosur.
Sipas OKB-së, lufta izraelite në Gaza ka çuar në zhvendosjen e brendshme të 85 për qind të popullsisë së territorit palestinez mes mungesës akute të ushqimit, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
Armiqësitë kanë vazhduar pandërprerë, megjithatë edhe dërgesat e ndihmave mbeten mjerisht të pamjaftueshme për të trajtuar katastrofën humanitare./aa
