Nëse Bashkimi Evropian (BE) pranon gjashtë vendet e Ballkanit Perëndimor, nuk do të ketë më zona gri në Evropë, tha sot ministrja e Jashtme gjermane Annalena Baerbock, e cila ndodhet për vizitë zyrtare në kryeqytetin e Bosnjë e Hercegovinës, Sarajevë.

Pas takimit me ministrin e Punëve të Jashtme të BeH-së, Elmedin Konakoviq dhe delegacionin e dy vendeve, Baerbock deklaroi se ideja evropiane u mbrojt në Sarajevë 30 vjet më parë.

"Ashtu si zemra e Evropës rreh sot me Kievin, në vitet e '90-ta ajo rrahu këtu, në Sarajevën evropiane", tha Baerbock. Ajo vuri në dukje se Gjermania është partneri më i madh i tregtisë së jashtme të BeH-së, një nga investitorët më të mëdhenj në vend dhe beson se potenciali investues është edhe më i madh.

"Ky takim nuk është i rastësishëm, po ndodh në një kohë vendimtare - në rrugën e BeH-së drejt BE-së. Vendi është në një udhëkryq vendimtar. Ka momente në histori kur duhet shfrytëzuar mundësia. Duam të bëjmë gjithçka që të hapërojmë së bashku për në BE. Presim raportin e Komisionit Evropian, i cili do të vlerësojë progresin në rrugën drejt hapjes së negociatave të anëtarësimit", tha Baerbock.

Ajo shtoi se përparimi në rrugën e zgjerimit mund të jetë i mundur vetëm nëse reformat kryhen shpejt. Baerbock shtoi se miratimi i ligjit kundër pastrimit të parave dhe financimit të terrorizmit ishte pjesë e rëndësishme e këtij mozaiku.

Duke vënë në dukje se Gjermania dëshiron që BeH "të hyjë në BE si një vend i tërë", Baerbock tha se "helmi më i madh për njerëzimin është ndryshimi i dhunshëm i kufijve".

"Kjo ka sjellë kaq shumë vuajtje në kontinentin tonë dhe në të gjithë botën, sepse ajo që vlen për dikë vlen për të gjithë. Një vend mund të bëhet anëtar i BE-së vetëm si tërësi. Qeveria nuk mund të veprojë pa opozitën. Politika nuk mund të veprojë pa shoqërinë civile, një rajon nuk mund të veprojë pa një tjetër, për këtë nevojiten të gjitha forcat e një vendi, ndaj duhet të theksojmë se do të emërtojmë qartë fantazitë secesioniste që duan të vënë gurë në këtë rrugë, sepse vetëm një BeH e përbashkët mund të shkojë në rrugën drejt BE-së", tha Baerbock, duke u bërë thirrje politikanëve në Banja Llukë që të ecin së bashku në rrugën evropiane.

Shefja e diplomacisë gjermane potencoi se diversiteti i BeH mund të jetë pasuria e BE-së, motivi i të cilit është "uniteti në diversitet". "Prandaj BeH është e destinuar për këtë dhe shpresoj se në fund të marsit do të vendosim në nivel evropian", shtoi Baerbock.

Sipas saj, procesi i anëtarësimit nuk po zhvillohet vetëm si "pro formë" por është kontribut i rëndësishëm për forcimin e vendeve në fushën e demokracisë, sundimit të ligjit dhe shoqërisë civile aktive.

"Nuk duhet të ketë zona gri në Evropë. Ne kemi parë në vitet e kaluara, për të cilat edhe BE-ja ka përgjegjësi, se zgjerimi ishte në sirtarin e pasmë dhe ne pamë se çfarë do të thotë. Ne nuk e forcuam bashkërisht kontinentin evropian. Prandaj kjo është arsyeja pse unë dua që të gjashtë vendet e Ballkanit Perëndimor të anëtarësohen në BE, por duhet të krijohen parakushte për këtë", tha Baerbock.

E pyetur nëse Gjermania dhe Franca kanë të njëjtat pikëpamje për Ballkanin Perëndimor, Baerbock tha se të dy vendet mbështesin fuqishëm të njëjtat pikëpamje.

"Zgjerimi është domosdoshmëri gjeopolitike. Jemi të bindur se do të forcojë Evropën nëse marrim gjashtë vendet e Ballkanit Perëndimor, sepse nuk do të ketë më zona gri në Evropë. Kjo do të tregojë se ne qëndrojmë së bashku në diversitetin tonë, që është forca e Evropës", ​​tha Baerbock.

Ministri i Punëve të Jashtme të BeH-së, Elmedin Konakoviq tha se vizita e ministres gjermane është mesazh i rëndësishëm për qytetarët e BeH-së dhe se kjo nënkupton vazhdimin e bashkëpunimit të mirë mes dy vendeve. Ai tha se Gjermania ka qenë një nga partnerët më të rëndësishëm ekonomikë të BeH-së për shumë vite dhe se mbështetja e Gjermanisë për rrugën evropiane të BeH-së është shumë e rëndësishme.

Duke iu referuar pyetjes së gazetarit për ndikimin e Rusisë në BeH, Konakoviq tha se përveç gazit që importon BeH "nuk po bën asgjë të veçantë në BeH, por po presin dhe po mbledhin frustrimet e njerëzit në këto zona dhe po i kthejnë në interesat e tyre".

BeH u vizitua të hënën nga ministri i Punëve të Jashtme dhe Bashkëpunimit Ndërkombëtar të Italisë, Antonio Tajani dhe ai i Austrisë për Çështjet Evropiane dhe Ndërkombëtare, Aleksander Schallenberg, të cilët i dërguan mesazhe të forta mbështetjeje BeH-së në rrugëtimin e saj evropian.

Vizitat zyrtare të zyrtarëve evropianë i paraprijnë Samitit të Këshillit Evropian në mars, në të cilin do të vendoset hapja e negociatave të anëtarësimit me BeH-në./aa