Muzeu Kombëtar i Artit Mesjetar në Korçë ka mirëpritur në mjediset e tij përfaqësues nga dy institucione të Kosovës, nga Muzeu i Artit Bashkëkohor dhe Galeria Kombëtare e Kosovës.
Në faqen e tij online MKAM e ka cilësuar këtë takim si miqësor dhe mjaft frutdhënës.
“Realizuam hapin e parë drejt një bashkëpunimi të ardhshëm, me fokus në restaurimin dhe konservimin e veprave të artit”, shkruan Muzeu Kombëtar i Artit Mesjetar.
Muzeu Kombëtar i Artit Mesjetar, në Korçë, u përurua më 24 prill 1980. Ai është një nga qendrat muzeore më të rëndësishme të Shqipërisë e më gjerë. Fondi i tij ka mbi 7 mijë objekte kulti e arti, kryesisht ikona e më pak punime guri, druri, metali e tekstili të krijuara nga mesjeta e hershme deri në fillim të shek. XX prej artistësh anonimë e të mirënjohur, nga treva të ndryshme të vendit.
Në sallën kryesore janë vendosur një koleksion ikonash dhe objekte nga më të mirat, krijuar në shekuj e që pasqyrojnë momente të ndryshme të zhvillimit të ikonografisë shqiptare dhe përfaqësuesit kryesorë të tyre. Aty ka vepra të autorëve anonimë të shek. XIII-XIV dhe të tjerë të mirënjohur si: Onufri, Onufër Qiprioti, Mësues Kostandini, Jeromonaku, Shpataraku, Selenicasi, vëllezërit Zografi etj./ata
