Pas 30 ditëve agjërim dhe falje besimtarët myslimanë festojnë sot Fitër Bajramin.

Një orë pas lindjes së diellit besimtarë të shumtë falën Namazin e Fitër Bajramit në sheshin “Skënderbej” në Tiranë, që njihet ndryshe edhe si festa e mbylljes së agjërimit.

Mijëra besimtarë myslimanë të kryeqytetit dhe jo vetëm, falën sot namazin e Fitër Bajramit në sheshin “Skënderbej” në Tiranë dhe mijëra të tjerë u tubuan në sheshet dhe xhamitë kryesore të çdo qyteti tjetër të vendit tonë, duke festuar kështu përfundimin me sukses të një muaji maratonë në aspektin e adhurimeve.

Programi i Fitër Bajramit në shesh filloi që në orët e para të mëngjesit me leximin e disa ajeteve nga Kur’ani Famëlartë.

Programi kulmoi me faljen e namazit të Fitër Bajramit, ku mijëra besimtarët e mbledhur në shesh i priu kryetari i komunitetit, H. Bujar Spahiu, për të vazhduar më pas me hutben e Bajramit, e cila u mbajt nga Myftiu i Tiranës, Gazment Teqja.

Gjatë hutbes, myftiu Teqja theksoi Bajramin si një ditë festi e triumfi dhe u lut për më shumë paqe, harmoni e solidaritet në mesin tonë.

“Është dita të falim e të tolerojmë nëse duam të na falë Zoti, të shkojmë dhe t’u zgjasim dorën atyre me të cilët deri dje nuk flisnim sepse kjo është festa e vërtetë. Le të shërbejë kjo ditë si shembull i mirë për shoqërinë dhe një kurim i plagëve që ajo po merr çdo ditë nga ikja e rinisë, dhuna ndaj grave e vajzave dhe vetmia e moshës së tretë. O Zot i Mëshirës dhe Faljes, forcoji zemrat tona në fe! Mbushi zemrat me besim! Udhëzona ne, familjet tona, shoqërinë tonë!” – theksoi Myftiu në fjalën e tij.

Më pas besimtarët e pranishëm në shesh u shpërndanë për të festuar me familjet dhe të afërmit e tyre.

Për besimtarët myslimanë dita nisi herët me ndarjen e Sadaka Fitrit për të varfrit dhe më pas me grumbullimin në shesh.

Namazi i Bajramit është një detyrim i domosdoshëm për çdo mysliman. Muhamedi i ka kushtuar rëndësi të veçantë duke i urdhëruar myslimanët që të falin këtë namaz.

Besimtarët veshin rroba të reja për Bajram, vizitojnë të afërmit dhe miqtë dhe përshëndeten me njëri-tjetrin duke uruar “Gëzuar Fitër Bajramin”.

Ëmbëlsirat përgatiten dhe shpërndahen me pjatën kryesore që është sewayi – kadaif i pjekur, i gatuar me qumësht dhe i servirur me fruta të thata.

Ndryshe nga Kurban Bajrami (i cili fokusohet te mishi), Fitër Bajrami festohet me ëmbëlsira tradicionale të quajtura gjithashtu Meedhi Eid.

Pas drekës së bollshme me familjen, dita mbyllet me vizita tek miqtë e të afërmit./ata