Janë liruar 4 nga 5 policët e Kosovës.
Lajmi u bë me dije nga kryeministri Albin Kurti gjatë mbledhjes së sotme të qeverisë.
Kurti tha se zyrtarët policorë ishin ndaluar në pikat kufitare mes Kosovës dhe Serbisë në Merdarë, Dheu i Bardhë e Jarinjë, si dhe në një pikëkalim kufitar mes Serbisë dhe Kroacisë.
Kryeministri i Kosovës, Albin Kurti akuzoi Serbinë se është burim i kërcënimit të rajonit dhe se po kërkon tensione në Kosovë.
Kurti, para kabinetit qeveritar, tha se Serbia si shenjë hakmarrje të votimit për anëtarësimin e Kosovës në Këshill të Evropës, ndali dhe keqtrajtoi dje qindra qytetarë kosovarë që po kalonin tranzit në Serbi.
Ai tha se zëvendësdrejtori i Policisë nga radhët e komunitetit serb, Dejan Jankoviq po vazhdon të mbahet në paraburgim në Rashkë.
Kurti bëri thirrje Ministrave të Punëve të Jashtme të Këshillit të Evropës, që në mbledhjen e muajit maj të pranojnë Kosovën në Këshill të Evropës.
/KosovaPress/
