Berati, një zonë trashëgimie e mbrojtur nga UNESCO, është një nga xhevahiret e Shqipërisë që tërheq mijëra vizitorë.
Ambasadori i BE-së Silvio Gonzato, i shoqëruar nga kryetari i Bashkisë së Beratit, Ervin Demo, kanë vizituar dje në Berat disa nga projektet kryesore të financuara nga BE.
Gonzato theksoi se, BE-ja është këtu për të mbështetur zhvillimin e qëndrueshëm të qytetit duke vlerësuar natyrën, traditat dhe vlerat lokale.
Fillimisht ata u ndalën në kantierin e një ure të re 280 metra mbi lumin Osum. Ura e Bilçës do të krijojë mundësi të reja për komunitetet lokale në të dy anët e lumit, do të lidhë Beratin me zonat rurale të tij të bukura dhe lehtësojë trafikun në lagjen historike të Goricës.
Qendra e Shërbimit Arsimor të Beratit, e rehabilituar nga programi EU4Muncipalities, ishte ndalesa e dytë. Qendra ofron shërbime mbështetëse arsimore për të gjitha kopshtet dhe shkollat e qytetit, për më shumë se 5000 fëmijë. Ajo gjithashtu ofron trajnime dhe rritje të ndërgjegjësimit për shëndetin mendor të fëmijëve për mësuesit dhe prindërit.
“Kur jeni në Berat, një vizitë në kala është e domosdoshme. Për ta bërë atë të aksesueshme për të gjithë, BE do të financojë punën për të përmirësuar aksesin në kështjellë, një hapësirë e gjallë me vlera unike arkitekturore”, nënvizoi Gonzato.
“Përmes një morie projektesh në Berat, në partneritet me bashkinë ne po krijojmë mundësi të reja për rritje dhe prosperitet ekonomik, duke fuqizuar bizneset lokale dhe duke promovuar turizëm që ruan natyrën dhe kremton esencën e Beratit”, tha Ambasadori i BE-së, Silvio Gonzato./ata
