Komiteti Ndërkombëtar i Aushvicit ka shprehur tronditjen e tij për performancën e fortë të partive të ekstremit të djathtë në zgjedhjet evropiane.
”Për të mbijetuarit e Holokaustit dhe kampet gjermane të përqendrimit dhe shfarosjes, ky rezultat zgjedhor përfaqëson një pikë kthese dëshpëruese”, deklaroi zëvendëspresidenti ekzekutiv, Christoph Heubner.
”Evropa po humbet dhe po harron veten, pasi në gjithnjë e më shumë vende po fitojnë influencë partitë nacionaliste dhe të ekstremit të djathtë, të cilat në fakt përçmojnë idenë evropiane të lindur nga tmerret e Luftës së Dytë Botërore dhe tmerri vrastar i kampeve”, shtoi Heubner.
”Megjithatë, Evropa mbetet shpresa e madhe për të mbijetuarit e Holokaustit”, shtoi ai.
Dhe pikërisht për këtë arsye ata kërkojnë urgjentisht që partitë e tjera në Parlamentin Evropian të mbrojnë këtë ide evropiane dhe të bashkohen kundër agjitacionit dhe nxitjes së forcave ekstremiste të djathta./ata
