Maqedoni e Veriut, arrihet marrëveshje për zgjedhjen e Sekretarit të Përgjithshëm të Këshillit Rajonal për Bashkëpunim

Ministri i Punëve të Jashtme i Maqedonisë së Veriut, Bujar Osmani, tha se është arritur marrëveshje për zgjedhjen e Sekretarit të Përgjithshëm të Këshillit Rajonal për Bashkëpunim (RCC), gjegjësisht kandidati Amer Kapetanoviq nga Bosnja e Hercegovina është propozuar unanimisht nga 13 vendet pjesëmarrëse.

Në kryeqytetin e Maqedonisë së Veriut, vend që kryeson me Procesin e Bashkëpunimit në Evropën Juglindore (SEECP), nesër do të mbahet takimi i Ministrave të Punëve të Jashtme dhe Samiti i krerëve të shteteve dhe qeverive të vendeve pjesëmarrëse të SEECP-së, ku do të marrin pjesë delegacionet e 13 vendeve pjesëmarrësve të Procesit, përfaqësues të Bashkimit Evropian dhe RCC-së.

Ministri në largim Osmani theksoi se marrëveshja e arritur për zgjedhjen e Sekretarit të Përgjithshëm të RCC-së është "një tjetër sukses i madh i diplomacisë sonë në nivel ndërkombëtar".

Ai shpjegoi se në këtë proces kishte pesë kandidatë dhe qëndrime të kundërta nga vendet pjesëmarrëse, duke shtuar se ky është një sukses i madh edhe për RCC-në, pasi ka pasur një ushtrues detyre të Sekretarit të Përgjithshëm në tre vitet e fundit.

"Pas tre vitesh, tre presidencave dhe shumë përpjekjeve për zgjedhjen e Sekretarit të Përgjithshëm të Këshillit Rajonal për Bashkëpunim, kam kënaqësinë të njoftoj se sot në Shkup ka ‘tym të bardhë’ në takimin e drejtorëve politikë të 13 vendeve pjesëmarrëse në Procesin e Bashkëpunimit në Evropën Juglindore, dhe njëzëri është zgjedhur apo nominuar kandidat për Sekretar të Përgjithshëm të RCC-së, z. Amer Kapetanoviq nga Bosnja e Hercegovina", tha Osmani.

Ai shtoi se Maqedonia e Veriut po përfundon një tjetër presidencë të suksesshme të një iniciative ndërkombëtare, e cila filloi në korrik 2023 nën moton "Tejkalimi i përçarjeve, ndërtimi i besimit".

Osmani gjithashtu bëri të ditur se në takimin e krerëve të shteteve, ku nikoqire do të jetë presidentja Gordana Siljanovska Davkova, pret që të miratohet deklaratë e përbashkët e 13 vendeve dhe të konfirmohet vendimi i drejtorëve politikë.

SEECP është një nismë rajonale në të cilën janë anëtarë 13 vende: Maqedonia e Veriut, Türkiye, Shqipëria, Kosova, Bosnja e Hercegovina, Bullgaria, Greqia, Rumania, Serbia, Kroacia, Moldavia, Mali i Zi dhe Sllovenia.

Nisma synon të krijojë një atmosferë besimi, marrëdhënie të mira fqinjësore dhe stabilitet./aa