SHBA-ja mohoi përfshirjen në vrasjen e pesë palestinezëve që prisnin ndihmën humanitare shumë të nevojshme, kur disa parashuta të kutive me ndihma të hedhura nga një aeroplan nuk u hapën në veriperëndim të qytetit të Gazës të premten.
“Ne jemi të vetëdijshëm për lajmet mbi civilët e vrarë si rezultat i hedhjes së ndihmave humanitare nga ajri”, tha Komanda Qendrore e SHBA-së (CENTCOM) në një deklaratë.
“Në kundërshtim me disa raportime, ky nuk ishte rezultat i aeroplanëve të SHBA-së”, shtoi Komanda.
CENTCOM shprehu “ngushëllimet për familjet e atyre që u vranë”.
Shërbimi i Mbrojtjes Civile Palestineze njoftoi të premten se pesë persona u vranë dhe disa të tjerë u plagosën nga kutitë e ndihmave të hedhura nga ajri në qytetin e Gazës pasi disa parashuta nuk u hapën siç duhet.
Për më shumë se një javë, vendet arabe, duke përfshirë Egjiptin, Emiratet e Bashkuara Arabe (EBA), Jordaninë, Katarin, Sulltanatin e Omanit dhe Bahreinin, kanë kryer operacione të përbashkëta për të hequr ndihmë ushqimore në Rripin e Gazës, përveç operacioneve të ngjashme të kryera nga SHBA-ja.
Duke shpërfillur vendimin e përkohshëm të Gjykatës Ndërkombëtare të Drejtësisë (GJND), Izraeli po i vazhdon sulmet e tij në Rripin e Gazës, ku të paktën 30.960 palestinezë janë vrarë, kryesisht gra dhe fëmijë, dhe 72.524 janë plagosur që nga 7 tetori, sipas autoriteteve shëndetësore palestineze.
Lufta izraelite në Gaza ka shtyrë 85% të popullsisë së territorit në zhvendosje të brendshme mes mungesës akute të ushqimit, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar, sipas OKB-së.
Izraeli akuzohet për gjenocid në GJND. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza./aa
