Ministrja e Shtetit për Rininë dhe Fëmijët, Bora Muzhaqi, theksoi sot se “rishikimi i ligjit “Për Rininë” është një proces i rëndësishëm për të siguruar transparencë dhe për të bashkëkrijuar politikat me të rinjtë, për të rinjtë”.
Në takimin e organizuar me përfaqësues të shoqërisë civile, anëtarë të Këshillit Kombëtar Rinor dhe Këshillave Vendorë Rinorë, si dhe të rinj e të reja nga e gjithë Shqipëria, Muzhaqi në fjalën e saj theksoi rëndësinë e këtij ligji, i cili u miratua në vitin 2019 për të krijuar një kuadër legjislativ të kushtuar mbështetjes dhe angazhimit të të rinjve.
“Ka kaluar një periudhë pesëvjeçare nga miratimi i këtij ligji dhe është koha për të reflektuar mbi zhvillimet dhe kërkesat e reja të të rinjve, për të përmirësuar dhe përshtatur ligjin,” tha Muzhaqi.
Ministrja Muzhaqi u shpreh se për rishikimin dhe përmirësimin e ligjit ka pasur kërkesa për ndryshime dhe zhvillime të mëtejshme të herëpashershme duke filluar që nga procesi i konsultimeve të Strategjisë Kombëtare të Rinisë deri në takimet e vazhdueshme me të rinj dhe shoqërinë civile.
Gjatë këtyre pesë viteve, ligji ka mundësuar krijimin e 61 këshillave vendorë rinorë në të gjithë bashkitë e vendit dhe Këshillin Kombëtar të Rinisë, që shërbejnë për të tejçuar zërin e të rinjve në nivel lokal dhe qendror.
Për sa i përket mbështetjes për projektet rinore, ministrja Muzhaqi u ndal tek thirrjet për financimin e projekteve rinore dhe grantet për infrastrukturë rinore.
Përmes Agjencisë Kombëtare të Rinisë, janë mbështetur 58 projekte rinore që kanë përfituar rreth 17,000 të rinj e të reja.
Ministrja përmendi gjithashtu ndërtimin e infrastrukturës rinore në 9 bashki dhe krijimin e hapësirave të reja në 6 bashki të tjera gjatë këtij viti, duke përfshirë Sarandën, Matin, Korçën, Librazhdin, Malësinë e Madhe dhe Fierin.
Muzhaqi theksoi se ky proces do të zhvillohet në bashkëpunim të ngushtë me të rinjtë dhe organizatat e shoqërisë civile, duke mbajtur në konsideratë komentet dhe sugjerimet e tyre.
Procesi do të fillojë me katër tryeza pune të dedikuara për kompetencat institucionale, organizimin dhe veprimtarinë e strukturave rinore, financimet për rininë, dhe kushtet për aktivizimin dhe mbështetjen e të rinjve.
Ajo njoftoi gjithashtu nisjen e një turi konsultimesh në të gjithë vendin, për të mbledhur mendimet dhe kërkesat e të rinjve dhe organizatave rinore nga çdo cep i Shqipërisë.
Ministrja Muzhaqi përfundoi fjalën e saj duke falënderuar të gjithë kontribuesit për arritjet deri më tani dhe shprehu besimin se ky proces do të jetë frytdhënës dhe do të ndihmojë në përmirësimin dhe zhvillimin e mëtejshëm të ligjit për rininë./ata
