Mbi 2 milionë besimtarë muslimanë nga e gjithë bota sot kanë filluar pelegrinazhin vjetor të Haxhit në Arabinë Saudite.
Derisa haxhinjtë bëjnë rrugën drejt Xhamisë së Madhe, ata pritet të arrijnë në Mina, duke shënuar fillimin e ritualeve të Haxhit dhe duke ndjekur gjurmët e profetit Muhamed.
E vendosur 7 kilometra në verilindje të Xhamisë së Madhe, Mina mban një pozicion vendimtar midis Mekës dhe Muzdelifes. Kjo luginë, e rrethuar me male në veri dhe në jug, është e populluar vetëm gjatë periudhës së Haxhit dhe shtrihet brenda kufijve të Haramit ose Xhamisë së Madhe.
Agjencia saudite e lajmeve raportoi se Arabia Saudite ka bërë përgatitje të gjera për të mirëpritur haxhinjtë në fazat fillestare të ritualeve, duke përfshirë ngritjen e katër spitaleve të gatshëm për t’u marrë me çdo rast, si dhe departamente për të luftuar stresin e nxehtësisë dhe goditjen nga dielli.
Gjithashtu janë ndërtuar kulla rezidenciale shumëkatëshe në Mina për të strehuar mbi 30 mijë haxhinj, duke shfaqur dizajne moderne të frymëzuara nga identiteti urban i vendeve të shenjta.
Më herët, mediat lokale raportuan se Arabia Saudite njoftoi planet për të pritur 1 mijë anëtarë të tjerë të familjeve të palestinezëve të vrarë ose të plagosur në Gaza për pelegrinazhin e Haxhit.
Iniciativa organizohet nga Ministria e Çështjeve Islame e Arabisë Saudite nën një direktivë të mbretit Salman bin Abdulaziz Al Saud në kuadër të programit të Kujdestarit të Mysafirëve të Dy Xhamive të Shenjta.
Direktiva e mbretit ndjek një të ngjashme të lëshuar në muajin maj, duke e çuar numrin e përgjithshëm të organizuar nga Palestina për Haxhin e këtij viti në 2 mijë.
Haxhi është shtylla e pestë e besimit islam, një ritual që duhet të kryhet nga të gjithë muslimanët, nëse janë financiarisht të mundshëm, të paktën një herë në jetën e tyre.
Haxhi përfshin disa rituale që synojnë të simbolizojnë konceptet thelbësore të besimit islam dhe të përkujtojnë sprovat e profetit Ibrahim dhe familjes së tij./aa
