"Disa pacientë po vdesin për shkak të mungesës së ilaçeve në Gaza"

Koordinatori i spitaleve fushore në Gaza, Marwan Al-Hams ka deklaruar se kushtet shëndetësore në Rripin e Gazës përkeqësohen gjithnjë e më shumë për shkak të sulmeve izraelite dhe se disa pacientë kanë vdekur për shkak të mingesës së ilaçeve.

Në një deklaratë për gazetarin e AA-së, Hams tha se "Situata shëndetësore në Rripin e Gazës është një katastrofë dhe është duke u përkeqësuar për shkak të sulmeve të Izraelit ndaj spitaleve që nga 7 tetori kur filloi lufta".

Ai shtoi se spitali "Nasser" në qytetin Khan Younis është plot me pacientë dhe të plagosur dhe se ka probleme me kanalizimin për shkak se ushtria izraelite shënjestron spitalin dhe rrethinat e tij. "Ne nuk kemi shtretër të mjaftueshëm për të pranuar më shumë pacientë dhe të plagosur. Stoku mjekësor po mbaron dhe disa pacientë po vdesin për shkak të mungesës së ilaçeve", tha Hams.

Më tej Hams tërhoqi vëmendjen se nëpër kampet ku qëndrojnë të zhvendosurit janë përhapur sëmundjet infektive, kryesisht hepatiti dhe se rreth spitalit dhe kampit janë shtuar insektet për shkak të ujërave të zeza.

Duke bërë të ditur se uji që arrin në tenda dhe kampe nuk është i përshtatshëm për t'u pirë, Hams tha: "Uria po shkatërron pjesën veriore të Rripit të Gazës dhe ne nuk mund të parandalojmë kequshqyerjen për fëmijët".

Në një deklaratë me shkrim të martën nga Zyra e qeverisë për mediat në Gaza thuhej se Izraeli dhe SHBA-ja kanë penguar që ndihmat të arrijnë tek populli palestinez, që Rripi i Gazës po shtyhet gjithnjë e më shumë drejt urisë, dhe se 3.500 fëmijë në Rripin e Gazës ku Izraeli vazhdon sulmet nga 7 tetori, janë në rrezik të vdekjes për shkak të kequshqyerjes.

"SHBA-ja dhe Izraeli janë të vendosur të dënojnë me uri 2.4 milionë civilë në Gaza", thuhej në deklaratën ku ndër të tjera shtohet se politika e urisë që zbatohej për pacientët dhe fëmijët dhe ndalimi i hyrjes së ushqimit dhe ilaçeve është mënyrë e rrezikshme çnjerëzore.

"Të gjitha këto janë krime të gjenocidit ndaj civilëve në Gaza", thuhej në deklaratë në të cilën u kërkua ndërhyrje urgjente ndërkombëtare për të ndalur këto krime.

- Pika kufitare Rafah është e mbyllur që nga 7 maji

Më 7 maj ushtria izraelite nisi sulm tokësor në rajonin Rafah të Gazës dhe njoftoi se ka marrë kontrollin e pikës kufitare me Egjiptin, në anën e Gazës.

Pika kufitare Rafah është e mbyllur që nga 7 maji, kur filloi pushtimi izraelit në rajon.

Mbyllja e pikës kufitare Rafah, e cila është pika e vetme e Rripit të Gazës për botën e jashtme përveç Izraelit, ndikon ndjeshëm në hyrjen e ndihmave humanitare në Gaza e cila po përballet me mungesë ushqimore./aa