Gjashtë të vdekur nga reshjet e dendura në Kinë

Të paktën gjashtë persona kanë humbur jetën sot pasi shirat e dendur përfshinë disa pjesë të Kinës, njoftoi media shtetërore.

Viktimat u raportuan në komunën jugperëndimore Chongqing, pas shirave të paprecedentë në rajon. Dy nga viktimat janë mbytur, ndërsa katër të tjerë kanë vdekur nga fatkeqësitë gjeologjike të shkaktuara nga reshjet e dendura.

Rajoni gjithashtu përjetoi stuhi të forta shiu në qarkun Dianjiang duke filluar nga nata e së mërkurës. Autoritetet lokale lëshuan alarme për 15 lumenj për shkak të reshjeve të dendura.

Disa rajone në gjithë 34 divizionet administrative të Kinës kanë përjetuar reshje të dendura shiu në javët e fundit, duke rezultuar në gati 70 viktima. Shirat, përmbytjet dhe rrëshqitjet e dheut kanë dëmtuar shumë rrugë dhe prona.

Mbi 130 njerëz, përfshirë turistë, u bllokuan të mërkurën në rajonin jugor të Tibetit, i njohur gjithashtu si Xizang, përgjatë kufirit me Nepalin, pasi shirat shkaktuan rrëshqitje dheu që shkatërruan rrugët.

Në provincën malore jugore Hunan, autoriteteve iu deshën katër ditë, deri në mbrëmjen e së hënës, për të mbyllur defektet në liqenin Dongting, në rrethin Huarong. Rreth 7.000 njerëz u zhvendosën për shkak të përmbytjeve të shkaktuara nga ujërat e derdhur të liqenit.

Ministria e Financave e Kinës ka lëshuar fonde emergjente në vlerë rreth 187 milionë dollarë që nga fundi i qershorit për të plotësuar nevojat e njerëzve të prekur nga moti i rëndë./aa